കോഹ്‌ലി മാജിക്

നാഗ്പ്പൂര്‍: ശ്രീലങ്കക്കെതിരെ ബാറ്റ്‌കൊണ്ട് സമ്പൂര്‍ണ ആധിപത്യം തീര്‍ത്ത ഇന്ത്യ, നായകന്‍ വിരാട് കോഹ്‌ലിയുടെ ഇരട്ട സെഞ്ചുറിയിലും രോഹിത് ശര്‍മ്മയുടെ ശതകത്തിലും രണ്ടാം ടെസ്റ്റില്‍ വിജയ വഴിയിലേക്ക് ചുവടുവയ്‌ക്കുന്നു. ഇന്നിങ്ങ്‌സ് തോല്‍വിയൊഴിവാക്കാന്‍ 405 റണ്‍സ് ആവശ്യമായ ശ്രീലങ്ക മൂന്നാം ദിനം കളിനിര്‍ത്തുമ്പോള്‍ ഒരു വിക്കറ്റ് നഷ്ടത്തില്‍ 21 റണ്‍സിലെത്തിനില്‍ക്കുന്നു. ഒമ്പതു വിക്കറ്റുള്‍ ശേഷിക്കെ 384 റണ്‍സിന് പിറകിലാണവര്‍.രണ്ട് ദിവസത്തെ കളിശേഷിക്കെ ഇന്ത്യ വിജയപീഠം കയറുമെന്ന് ഉറപ്പായി.

ഓപ്പണര്‍ സമരവിക്രമയുടെ വിക്കറ്റാണ് ശ്രീലങ്കയ്‌ക്ക് നഷ്ടമായത്്.ഇശാന്ത് ശര്‍മയുടെ പന്തില്‍ ക്ലീന്‍ ബൗള്‍ഡ്.

കോഹ്‌ലി അടിച്ചെടുത്ത 213 റണ്‍സിന്റെയും രോഹിത് ശര്‍മ പുറത്താകാതെ നേടിയ 102 റണ്‍സിന്റെയും പിന്‍ബലത്തില്‍ ഇന്ത്യ ആറു വിക്കറ്റിന് 610 റണ്‍സെന്ന കൂറ്റന്‍ സ്‌കോര്‍ പടുത്തുയര്‍ത്തി ഇന്നിങ്ങസ് അവസാനിപ്പിച്ചു. ശ്രീലങ്ക ഒന്നാം ഇന്നിങ്ങ്‌സില്‍ 205 റണ്‍സാണെടുത്തത്.

അഞ്ചാം ഇരട്ട സെഞ്ചുറി കുറിച്ച കോഹ്‌ലി രണ്ട് സെഞ്ചുറി കൂട്ടുകെട്ടുകളില്‍ പങ്കാളിയായി. ആദ്യം ചേതേശ്വര്‍ പൂജാരയ്‌ക്കൊപ്പവും പിന്നീട് രോഹിത് ശര്‍മ്മയ്‌ക്കൊപ്പവുമാണ് കോഹ്‌ലി നൂറിന്റെ കൂട്ടുകെട്ടുകളുണ്ടാക്കിയത്്. കഴിഞ്ഞ ദിവസം 121 റണ്‍സുമായി പുറത്താകാതെ നിന്ന പൂജാര 143 റണ്‍സുമായി മടങ്ങി. തുടര്‍ന്നെത്തിയ രഹാനെയക്ക് തിളങ്ങാനായില്ല. രണ്ട് റണ്‍സുമായി ക്രീസ് വിട്ടു.

രോഹിത് ശര്‍മ കോഹ്‌ലിക്കൊപ്പം ചേര്‍ന്നതോടെ ഇന്ത്യന്‍ സ്‌കോര്‍ബോര്‍ഡിലേക്ക് റണ്‍സ് ഒഴുകാന്‍ തുടങ്ങി. ഇരുവരും ശ്രീലങ്കന്‍ ആക്രണത്തെ ശക്തമായി നേരിട്ടു. 267 പന്ത് നേരിട്ട കോഹ് ലി 17 ഫോറും രണ്ട് സിക്‌സറും പൊക്കി 213 റണ്‍സുമായാണ് മടങ്ങിയത്്. പെരേരയുടെ പന്തില്‍ തിരുമാനെ ഇന്ത്യന്‍ നായകനെ പിടികൂടി.

രോഹിത് ശര്‍മ 160 പന്തില്‍ നിന്നാണ് 102 റണ്‍സ് നേടിയത്. എട്ട് ഫോറും ഒരു സിക്‌സറും അടിച്ച് കീഴടങ്ങാതെ നിന്നു.

ശ്രീലങ്കയ്‌ക്കുവേണ്ടി പെരേര 202 റണ്‍സിന് മൂന്ന് വിക്കറ്റുകള്‍ നേടി. ഗാമേജ്, ഹെറാത്ത്്, ശനാക എന്നിവര്‍ ഓരോ വിക്കറ്റ് വീഴ്‌ത്തി.

സ്‌കോര്‍ബോര്‍ഡ്: ശ്രീലങ്ക ഒന്നാം ഇന്നിങ്ങ്‌സ് 205. ഇന്ത്യ ഒന്നാം ഇന്നിങ്ങ്‌സ്: രാഹുല്‍ ബി ഗാമേജ് 7, വിജയ് സി പെരേര ബി ഹെറാത്ത്് 128, സി എ പൂജാര ബി ശനാക 143, വി കോഹ്‌ലി സി കരുണ രത്‌ന ബി പെരേര 213, രഹാനെ സി കരുണരത്‌ന ബി പെരേര 2, ആര്‍ ജി ശര്‍മ നോട്ടൗട്ട് 102, ആര്‍ അശ്വിന്‍ ബി പെരേര 5, സാഹ നോട്ടൗട്ട് 1, എക്‌സ്ട്രാസ് 9 , ആകെ ആറു വിക്കറ്റിന് 610 ഡിക്ലയേര്‍ഡ്

വിക്കറ്റ് വീഴ്ച 1-7, 2-216, 3-399, 4-410, 5-583, 6-597.

ബൗളിങ്ങ് : ലക്മല്‍ 29-2-111-0, ഗാമേജ് 35-8-97-1, ഹെറാത്ത് 39-11-81-1, ശനാക 26.1-4-103-1, പെരേര 45-2-202-3, കരുണരത്‌ന 2-0-8-0

ശ്രീലങ്ക: രണ്ടാം ഇന്നിങ്ങ്‌സ്: സമരവിക്രമ ബി ഇയാന്‍ ശര്‍മ 0, കരുണരത്‌ന നോട്ടൗട്ട് 11, തിരിമാനെ നോട്ടൗട്ട് 9 , എക്‌സ്ട്രാസ്് 1, ആകെ ഒരു വിക്കറ്റിന് 21.

ബൗളിങ്ങ്: ശര്‍മ 4-1-15-1, അശ്വിന്‍ 4-3-5-0, ജഡേജ 1-1-0-0.