ഹരിയാന: രഞ്ജി ട്രോഫിയില് ഹരിയാനയ്ക്കെതിരായ നിര്ണായക മത്സരത്തില് കേരളം ഇന്നിംഗ്സ് ലീഡിലേക്ക്. രണ്ടാം ദിനം കളി നിര്ത്തുമ്പോള് കേരളം മൂന്നു വിക്കറ്റ് നഷ്ടത്തില് 203 റണ്സ് എന്ന നിലയിലാണ്. ഹരിയാനയുടെ ഒന്നാം ഇന്നിംഗ്സ് സ്കോറിനു അഞ്ചു റണ്സ് മാത്രം പിന്നില്. അര്ധ സെഞ്ചുറികള് നേടിയ ജലജ് സക്സേന (91), രോഹന് പ്രേം(79) എന്നിവരുടെ പ്രകടനമാണ് കേരളത്തെ മികച്ച നിലയിലേക്കു നയിച്ചത്. മൂന്നാം വിക്കറ്റില് ഇവര് 172 റണ്സിന്റെ റെക്കോര്ഡ് കൂട്ടുകെട്ടാണ് സൃഷ്ടിച്ചത്.
ഓപ്പണര് അരുണ് കാര്ത്തിക്കിനെ (3) തുടക്കത്തിലെ നഷ്ടമായതിനു ശേഷമാണ് സക്സേനയും രോഹനും കത്തിക്കയറിയത്. 205 പന്ത് നേരിട്ട് സെഞ്ചുറിയുടെ പടിക്കലെത്തിയ ശേഷം സക്സേന വീണു. പിന്നാലെയെത്തിയ കഴിഞ്ഞ മത്സരങ്ങളിലെ ഹീറോ സഞ്ജു സാംസണും പെട്ടെന്നു പുറത്തായി. രണ്ടാം ദിവസം കളി നിര്ത്തുമ്പോള് രോഹനും റണ്ണൊന്നും എടുക്കാതെ ബേസില് തമ്പിയുമാണ് ക്രീസില്.
ഹരിയാനയിലെ ചൗധരി ബന്സിലാല് സ്റ്റേഡിയത്തില് ഹരിയാനയെ ആദ്യ ഇന്നിംഗ്സില് കേരളം 208ല് എറിഞ്ഞൊതുക്കിയിരുന്നു. ഒന്പതിന് 207 എന്ന നി ലയില് ആദ്യദിനം അവസാനിപ്പിച്ച ഹരിയാനയ്ക്കു രണ്ടാം ദിനം ഒരു റണ്സ് കൂടി മാത്രമാണ് ചേര്ക്കാന് കഴിഞ്ഞത്. നാലു വിക്കറ്റ് നേടിയ സന്ദീപ് വാര്യരുടെ പ്രകടനമാണ് ഹരിയാനയെ തകര്ത്തത്.
ടോസ് നേടിയ ഹരിയാന ബാറ്റിംഗ് തെരഞ്ഞെടുക്കുകയായിരുന്നു. ഓപ്പണിംഗ് വിക്കറ്റില് 66 റണ്സ് കൂട്ടിച്ചേര്ക്കാനും അവര്ക്കായി. തുടര്ന്ന് കൃത്യമായ ഇ ടവേളകളില് ഹരിയാനയ്ക്കു വിക്കറ്റുകള് നഷ്ടപ്പെട്ടുകൊണ്ടിരുന്നു. കേരളത്തിന്റെ ബൗളര്മാര്ക്കു മുന്നില് മധ്യനിര തകര്ന്നതാണ് ഹരിയാനയ്ക്കു തിരിച്ചടിയായത്.
