ടൂറിന്: യുവേഫ ചാമ്പ്യന്സ് ലീഗ് ഫുട്ബോളില് ഇന്ന് ക്ലാസ്സിക്ക് ത്രില്ലര്. ഇറ്റാലിയന് സീരി എ ചാമ്പ്യന്മാരായ യുവന്റസും സ്പാനിഷ് കരുത്തന്മാരായ ബാഴ്സലോണയുമാണ് സൂപ്പര് പോരാട്ടത്തില് കൊമ്പുകോര്ക്കുന്നത്. ടൂറിനിലെ അലയന്സ് സ്റ്റേഡിയത്തിലാണ് കളി.
നൗകാമ്പില് ഇരുടീമുകളും ഏറ്റുമുട്ടിയപ്പോള് ബാഴ്സലോണ മറുപടിയില്ലാത്ത മൂന്ന് ഗോളുകള്ക്ക് വിജയിച്ചിരുന്നു. ഈ പരാജയത്തിന് പകരം വീട്ടാനുള്ള സുവര്ണ്ണാവസരമാണ് ഇന്ന് യുവന്റസിനുള്ളത്. എന്നാല് അടുത്ത കാലത്തായി മോശം പ്രകടനമാണ് അവരുടേത്് കഴിഞ്ഞ ദിവസം സീരി എയില് സാംപദോറിയയോട് 3-2ന് പരാജയപ്പെട്ടിരുന്നു. എങ്കിലും സ്വന്തം തട്ടകത്തിലാണ് കളി എന്നതിന്റെ ആത്മവിശ്വാസത്തിലാണ് യുവന്റസ്.
ഗൊണ്സാലോ ഹിഗ്വയില്, പോള് ഡൈബാല എന്നിവരിലാണ് അവരുടെ പ്രതീക്ഷകള് മുഴുവന്.
അതേസമയം ബാഴ്സയാകട്ടെ മിന്നുന്ന ഫോമിലാണ്. മെസ്സി, സുവാരസ് എന്നിവരാണ് അവരുടെ പ്രതീക്ഷകള്. ഒപ്പം ആന്ദ്രെ ഇനിയേസ്റ്റ, പൗളിഞ്ഞോ, ഇവാന് റാക്കിറ്റിക് തുടങ്ങി മികച്ച താരനിരയും അവര്ക്കുണ്ട്.
അതേസമയം ചില മികച്ച താരങ്ങള് പരിക്കിന്റെ പിടിയിലാണ്. ഗ്രൂപ്പിലെ കഴിഞ്ഞ മത്സരത്തില് ബാഴ്സ ഒളിമ്പിയാക്കോസിനോട് ഗോള്രഹിത സമനില വഴങ്ങിയിരുന്നു. ഗ്രൂപ്പ് ഡിയില് നാല് മത്സരങ്ങള് കളിച്ച ബാഴ്സയാണ് 10 പോയിന്റുമായി മുന്നില്. 7 പോയിന്റുള്ള യുവന്റസ് രണ്ടാമത്. ഇന്ന് യുവന്റസിനോട് സമനില വഴങ്ങിയാല് പോലും ബാഴ്സക്ക് നോക്കൗട്ട് ഉറപ്പിക്കാം. അതേസമയം യുവന്റസിന് സാധ്യത നിലനിര്ത്തണമെങ്കില് ജയം അനിവാര്യമാണ്. ഗ്രൂപ്പിലെ മറ്റൊരു മത്സരത്തില് സ്പോര്ട്ടിങ് ക്ലബ് ഒളിമ്പിയാക്കോസുമായി ഏറ്റുമുട്ടും. സ്പോര്ട്ടിങിന് നാല് പോയിന്റാണുള്ളത്. ഒരു പോയിന്റുള്ള ഒളിമ്പിയാക്കോസിന്റെ സാധ്യത മങ്ങി.
ഗ്രൂപ്പ് എയില് മികച്ച ഫോമില് കളിക്കുന്ന മാഞ്ചസ്റ്റര് യുണൈറ്റഡിന് എവേ മത്സരത്തില് എതിരാളികള് എഫ്സി ബാസല്. കളിച്ച നാലും ജയിച്ച് 12 പോയിന്റുമായി ഒന്നാമത് നില്ക്കുന്ന മാഞ്ചസ്റ്ററിന് ഇന്ന് ഒരു സമനില മതി നോക്കൗണ്ട് ഉറപ്പിക്കാന്. ബാസലിന് 4 കളികളില് നിന്ന് രണ്ട് ജയത്തോടെ 6 പോയിന്റുണ്ട്. അവര്ക്ക് നോക്കൗട്ട് സാധ്യത നിലനിര്ത്താന് ജയം അനിവാര്യം. മറ്റൊരു മത്സരത്തില് 6 പോയിന്റുമായി മൂന്നാമതുള്ള സിഎസ്കെഎ മോസ്കോ പോയിന്റൊന്നുമില്ലാത്ത ബെനഫിക്കയെ നേരിടും. ബെനഫിക്ക ടൂര്ണമെന്റില് നിന്ന് ഏറെക്കുറെ പുറത്തായിക്കഴിഞ്ഞ ടീമാണ്.
ഗ്രൂപ്പ് ബിയില് 12 പോയിന്റുമായി നോക്കൗട്ട് ഉറപ്പിച്ച പിഎസ്ജിക്ക് എതിരാളികള് മൂന്ന് പോയിന്റുമായി പുറത്തേക്കുള്ള വഴിയില് നില്ക്കുന്ന സെല്റ്റിക്കാണ്. മറ്റൊരു എവേ മത്സരത്തില് 9 പോയിന്റുമായി ഏറെക്കുറെ നോക്കൗട്ട് ഉറപ്പിച്ച ബയേണ് മ്യൂണിക്ക് നോക്കൗട്ടില് കടക്കാതെ പുറത്തായ ആന്ഡര്ലക്റ്റുമായി ഏറ്റുമുട്ടും. ഈ മത്സരത്തില് ഒരു സമനില മതി ബയേണിന് അവസാന 16-ല് ഇടം ഉറപ്പിക്കാന്.
ഗ്രൂപ്പ് സിയിലെ എവേ മത്സരത്തില് ചെല്സി ക്വാറബാഗിനെ നേരിടുമ്പോള് ഹോം മത്സരത്തില് അത്ലറ്റികോ മാഡ്രിഡിന് എതിരാളികള് റോമയാണ്. നാല് കളികളില് നിന്ന് എട്ട് പോയിന്റുമായി ഗ്രൂപ്പില് ഒന്നാമത് റോമയാണ്. 7 പോയിന്റുമായി ചെല്സി രണ്ടാമതും മൂന്ന് പോയിന്റുമായി അത്ലറ്റികോ മാഡ്രിഡ് മൂന്നാമതും. ക്വാറാബര്ഗ് 2 പോയിന്റുമായി ഏറ്റവും പിന്നില്.
