മന്ത്രി ദന്തഗോപുരത്തില് നിന്നു താഴെയിറങ്ങി സാധാരണക്കാരനായി നിന്ന് നിയമത്തെ നേരിടണമെന്ന് ഹൈക്കോടതി. മന്ത്രി സ്ഥാനത്തു തുടരാനാണോ ഹര്ജി നല്കിയത്. മന്ത്രി തന്നെ ഇത്തരം ഹര്ജി നല്കി രക്ഷപ്പെടാന് ശ്രമിക്കുന്നത് ദൗര്ഭാഗ്യകരമാണ്.
സര്ക്കാരിനെതിരെ കോടതിയെ സമീപിച്ച വ്യക്തിക്ക് ഇനി എങ്ങനെ മന്ത്രിസഭയില് ഇരിക്കാനാവും. മന്ത്രിസഭാ തീരുമാനം മന്ത്രി തന്നെ കോടതിയില് ചോദ്യം ചെയ്യുന്നത് കൂട്ടുത്തരവാദിത്തം നഷ്ടപ്പെടുത്തുന്ന നടപടിയാണ്. കളക്ടറുടെ റിപ്പോര്ട്ടിനെതിരെ ഹര്ജി നല്കുന്നതിനു പകരം ഹര്ജിക്കാരന് ഉചിതമായ ഫോറത്തെ സമീപിക്കണം. കളക്ടര് ഉള്പ്പെടെയുള്ളവര്ക്ക് മുന്നില് പരാതി ഉന്നയിക്കാം.
കളക്ടറുടെ റിപ്പോര്ട്ടിലെ രണ്ടുവരി പരാമര്ശം നീക്കി കളങ്കരഹിതനാകാന് നല്കിയ ഹര്ജിയാണിതെന്നും കോടതി ചൂണ്ടിക്കാട്ടി. കോടതിയുടെ മേല് കുറ്റം ചാരി രക്ഷപ്പെടാനാണ് ശ്രമം. കളക്ടറുടെ റിപ്പോര്ട്ടാണ് ചോദ്യം ചെയ്യുന്നത്. കളക്ടര് സര്ക്കാരിനു നല്കിയ റിപ്പോര്ട്ടിന്മേല് കോടതിക്ക് പ്രവര്ത്തിക്കാനാവില്ല. ഹര്ജി നിലനില്ക്കുമോയെന്നാണ് പരിശോധിക്കുന്നത്. മന്ത്രിയെന്ന നിലയില് ഹര്ജി നല്കാനാവില്ല. മുന്മന്ത്രിയെന്ന നിലയില് സാധ്യമാണ്.
വ്യക്തിയെന്ന നിലയിലാണ് ഹര്ജിയെന്നു തോമസ് ചാണ്ടിക്കു വേണ്ടി ഹാജരായ സുപ്രീം കോടതി അഭിഭാഷകന് വിവേക് തന്ഖ വാദിച്ചെങ്കിലും അതും കോടതി തള്ളി. മന്ത്രിക്ക് വ്യക്തിയെന്ന നിലയില് ഹര്ജി നല്കാനാവില്ല. മന്ത്രിക്ക് മറ്റൊരു പെരുമാറ്റച്ചട്ടമാണ് ബാധകമാവുക. മന്ത്രി ഹര്ജി നല്കിയാല് സര്ക്കാര് എങ്ങനെ പ്രവര്ത്തിക്കും. സര്ക്കാര് അഭിഭാഷകന് മന്ത്രിക്കെതിരെ നിലപാട് സ്വീകരിച്ചാല് സര്ക്കാരിന് മന്ത്രിയില് വിശ്വാസം നഷ്ടമായെന്നാണ് അര്ത്ഥം. സ്വന്തം സര്ക്കാരിനെതിരെ മന്ത്രി ഹര്ജി നല്കുന്നത് കേട്ടുകേള്വിയില്ലാത്ത നടപടിയാണ്, കോടതി പറഞ്ഞു.
