ഇറ്റലിയെ മറികടന്ന് ലോകകപ്പ് യോഗ്യത നേടിയ സ്വീഡിഷ് താരങ്ങളുടെ ആഹ്ലാദം
മിലാന്: പ്രതിരോധ ഫുട്ബോളിന്റെ ചക്രവര്ത്തിമാര്… ഗോളടിച്ചില്ലെങ്കിലും ഗോളടിപ്പിക്കാതെ എതിരാളികളെ വട്ടംകറക്കുന്നവര്… നാലു തവണ ഫുട്ബോളിലെ ലോക കിരീടം ചൂടിയ ഇറ്റലിയെ വിശേഷിപ്പിക്കാന് ഇതില് കൂടുതലൊന്നും വേണ്ട.
2018 റഷ്യന് ലോകകപ്പില് പക്ഷേ, ഈ വിശേഷണങ്ങള്ക്ക് ഇടമില്ല. ചരിത്രത്തില് മൂന്നാം തവണ ഇറ്റലിയില്ലാത്ത ലോകകപ്പിന് അരങ്ങൊരുങ്ങുന്നു. പ്ലേ ഓഫില് സ്വീഡനു മുന്നില് മുട്ടുമടക്കി അസൂറികള്ക്ക് മടക്കം.
ലയണല് മെസ്സിമാരും ക്രിസ്റ്റ്യാനൊ റൊണാള്ഡൊമാരും നിറയുന്ന കാലത്ത് ഗോളടിപ്പിക്കാത്തവരെ ആര്ക്കും വേണ്ടെങ്കിലും കളത്തില് പ്രതിരോധ തന്ത്രങ്ങളുടെ വേറിട്ട, മാന്യമായ വഴി തുറക്കുന്ന ഇറ്റാലിയന് സൗന്ദര്യമില്ലാതെ എങ്ങനെ റഷ്യന് ലോകകപ്പ് പൂര്ണമാകും. ആക്രമണ ഫുട്ബോളിന്റെ ചന്തമുള്ള ഹോളണ്ടിനും ലാറ്റിനമേരിക്കയുടെ പൂര്ണതയുള്ള ചിലിക്കും പുറമെ മറ്റൊരു നഷ്ടം കൂടി…
സ്വീഡനെതിരായ പ്ലേ ഓഫിലെ തോല്വിയാണ് ഇറ്റലിയുടെ വഴിയടച്ചത്. രണ്ടാം പാദം ഗോള്രഹിത സമനിലയില് പിരിഞ്ഞെങ്കിലും ആദ്യപാദത്തില് നേടിയ 1-0ന്റെ വിജയം സ്വീഡന് റഷ്യന് ടിക്കറ്റ് സമ്മാനിച്ചു. അങ്ങനെ 60 വര്ഷത്തിനു ശേഷം ആദ്യമായി ഇറ്റലി പുറത്ത്. 1958ലെ സ്വീഡന് ലോകകപ്പാണ് അസൂറികളില്ലാതെ കളിച്ച അവസാനത്തേത്ത്. ഇത്തവണ സ്വീഡന് വഴിമുടക്കിയെന്നത് യാദൃശ്ചികം. 2006ന് ശേഷം ആദ്യമായാണ് സ്വീഡന് ലോകകപ്പിനെത്തുന്നത്. ലോകകപ്പ് നേടിയിട്ടുള്ള രാജ്യങ്ങളില് റഷ്യന് ലോകകപ്പിന് യോഗ്യത നേടാനാകാതെ പോയ ഏക ടീമും ഇറ്റലി.
നാല് തവണ ലോകകപ്പ് കിരീടം നേടിയ ചരിത്രമുള്ള ഇറ്റലിയില്ലാത്ത മൂന്നാം ലോകകപ്പാണിത്. 1930ല് ഉറുഗെയിലും അവരുണ്ടായിരുന്നില്ല. സ്വീഡനു ശേഷം നടന്ന 14 ലോകകപ്പുകളിലും ഇറ്റലി പങ്കെടുത്തു. 1934, 38, 82, 2006 വര്ഷങ്ങളിലാണ് ചാമ്പ്യന്മാരായി. 1970, 94ല് റണ്ണറപ്പുകള്. രണ്ടു തവണ സെമിയിലും പുറത്തായി. എന്നാല്, കഴിഞ്ഞ രണ്ടു തവണയും, ദക്ഷിണാഫ്രിക്കയിലും ബ്രസീലിലും ഗ്രൂപ്പ്റൗണ്ടില് തന്നെ പുറത്തായിരുന്നു.
സാന്സിറോയിലെ രണ്ടാം പാദത്തില് ഫൗളുകളുടെ അതിപ്രസരമായിരുന്നു. ഒമ്പത് തവണ റഫറിക്ക് മഞ്ഞക്കാര്ഡ് പുറത്തെടുക്കേണ്ടിവന്നു. 76 ശതമാനം സമയവും പന്തു കൈവശം വച്ചെങ്കിലും സ്വീഡിഷ് പ്രതിരോധം ഭേദിക്കാനായില്ല. കാണികളുടെ നിര്ലോഭമായ പിന്തുണയുണ്ടായിട്ടും ഗോള് നേടാനാകാതെ പോയതിന് ഇറ്റാലിയന് സ്ട്രൈക്കര്മാരുടെ പിടിപ്പുകേട് തന്നെയാണ് മുഖ്യകാരണം. അന്റോണിയോ കാന്ഡ്രെവയ്ക്കും അലെസാന്ഡ്രോ ഫ്ളോറന്സിക്കും നേരിയ വ്യത്യാസത്തില് ഗോളവസരങ്ങള് നഷ്ടമായി. സ്വീഡിഷ് ഗോളി റോബിന് ഓല്സന് ബാറിന് കീഴില് നടത്തിയ മിന്നുന്ന പ്രകടനവും അവരെ തടഞ്ഞു.
കഴിഞ്ഞ വെള്ളിയാഴ്ച സ്റ്റോക്ഹോമിലെ ഫ്രണ്ട്സ് അരീനയിലെ ആദ്യ പാദത്തില് 61-ാം മിനിറ്റില് ജേക്കബ് ജൊനാസന്റെ ഗോള് ഒടുവില് സ്വീഡന്റെ ജീവവായുമായി. ഇറ്റലി പുറത്തായതിനു പിന്നാലെ ഇതിഹാസ ഗോള് കീപ്പര് ജിയാന് ലൂജി ബഫണിന്റെ രാജ്യാന്തര കരിയറിനും അവസാനമായി. ലോകകപ്പ് കഴിഞ്ഞ് വിരമിക്കുമെന്ന് ബഫണ് നേരത്തേതന്നെ പ്രഖ്യാപിച്ചിരുന്നു.
യോഗ്യതാ റൗണ്ടിലെ താരതമ്യേന മോശം പ്രകടനമാണ് ഇറ്റലിയെ പ്ലേ ഓഫിലേക്ക് തള്ളിവിട്ടത്. സ്പെയിനിനൊപ്പം ഗ്രൂപ്പ് ജിയിലായിരുന്നു. 10 മല്സരങ്ങളില്നിന്ന് ഏഴു ജയവും രണ്ടു സമനിലയും ഒരു തോല്വിയും ഉള്പ്പെടെ രണ്ടാമതെത്താനേ കഴിഞ്ഞുള്ളൂ.
