കേരളം കിരീടം നിലനിര്‍ത്തി

ഭോപ്പാല്‍: ദേശീയ ജൂനിയര്‍ സ്‌കൂള്‍ അത്‌ലറ്റിക്‌സ് ചാമ്പ്യന്‍ഷിപ്പില്‍ കേരളം കിരീടം നിലനിര്‍ത്തി. തുടര്‍ച്ചയായ 19-ാം തവണയാണ് കേരളം കിരീടം നേടുന്നത്. 1999-ല്‍ തിരുവനന്തപുരത്ത് തുടങ്ങിയ കിരീടനേട്ടമാണ് കേരളം എതിരാളികള്‍ക്ക് വിട്ടുകൊടുക്കാതെ ഇത്തവണയും നിലനിര്‍ത്തിയത്. എതിരാളികളെ ഏറെ പിന്തള്ളിയാണ് ഓവറോള്‍ കിരീടം നിലനിര്‍ത്തിയത്. മൂന്നായി വിഭജിച്ചശേഷമുള്ള രണ്ടാം മീറ്റില്‍ 116 പോയിന്റാണ് കേരളത്തിന്റെ കൗമാര താരങ്ങള്‍ ട്രാക്കില്‍നിന്നും ഫീല്‍ഡില്‍നിന്നുമായി വാരിക്കൂട്ടിയത്. 41 പോയിന്റുമായി തമിഴ്‌നാട് രണ്ടാമതെത്തിയപ്പോള്‍ വിദ്യാഭാരതി 30 പോയിന്റ് നേടി മൂന്നാമതെത്തി.

അവസാന ദിനമായ ഇന്നലെയും കേരള താരങ്ങള്‍ അഞ്ച് സ്വര്‍ണ്ണം വാരിക്കൂട്ടി. ഇതോടെ ഗൊരഗാവിലെ സായി കോംപ്ലക്‌സില്‍ നിന്ന് 13 സ്വര്‍ണ്ണവും ഒന്‍പത് വെള്ളിയും നാല് വെങ്കലവും കേരളത്തിന്റെ അക്കൗണ്ടിലെത്തി. കഴിഞ്ഞ വര്‍ഷം വഡോദരയില്‍ നേടിയതിനേക്കാള്‍ മികച്ച മെഡല്‍ നേട്ടമാണ് ഇത്തവണത്തേത്. കഴിഞ്ഞ വര്‍ഷം 12 സ്വര്‍ണ്ണവും അഞ്ച് വെള്ളിയും 7 വെങ്കലവുമായിരുന്നു കേരളം നേടിയത്.

കഴിഞ്ഞ വര്‍ഷത്തെപോലെ ആണ്‍കുട്ടികളിലും പെണ്‍കുട്ടികളിലും കേരളമാണ് ജേതാക്കള്‍. പെണ്‍കുട്ടികള്‍ 79 പോയിന്റും ആണ്‍കുട്ടികള്‍ 37 പോയിന്റും കേരളത്തിന്റെ പട്ടികയില്‍ ചേര്‍ത്തു. വിദ്യാഭാരതി (30 പോയിന്റ്) ആണ്‍കുട്ടികളില്‍ രണ്ടാമതായി. 18 പോയിന്റുമായി ഹരിയാന മൂന്നാമത്. പെണ്‍കുട്ടികളില്‍ 38 പോയിന്റുമായി തമിഴ്‌നാട് രണ്ടാമത്. 19 പോയിന്റുള്ള പഞ്ചാബാണ് മൂന്നാമത്.

അവസാനദിനം 200മീറ്ററില്‍ റെക്കോര്‍ഡ് സ്വര്‍ണ്ണംനേടി സ്പ്രിന്റ് ഡബിള്‍ തികച്ച കേരളത്തിന്റെ ആന്‍സി സോജന്‍ പെണ്‍കുട്ടികളില്‍ മികച്ച താരമായത്. ആദ്യ ദിനം ലോങ്ജമ്പില്‍ റെക്കോഡ് സ്വര്‍ണ്ണം ആന്‍സിയുടെ മികവില്‍ 4-100 മീറ്റര്‍ റിലേയിലും റെക്കോര്‍ഡോടെ കേരളം പൊന്നണിഞ്ഞു. ഇതോടെ ആകെ നാല് സ്വര്‍ണ്ണം ആന്‍സി സ്വന്തം പേരില്‍ ചേര്‍ത്തു. ആണ്‍കുട്ടികളില്‍ വിദ്യാഭാരതിയുടെ അഭിഷേക് സിങ് മികച്ചതാരമായി. ഷോട്പുട്ടില്‍ റെക്കോഡ് തിരുത്തിയ പ്രകടനമാണ് അഭിഷേകിന് പുരസ്‌കാരംനേടിക്കൊടുത്തത്. ഡിസ്‌കസ് ത്രോയില്‍ മൂന്നാംസ്ഥാനവും നേടി.

മീറ്റിലെ അവസാന ഇനമായ 4-400 മീറ്റര്‍ റിലേ ഇരുവിഭാഗങ്ങളിലും കേരളം പൊന്നണിഞ്ഞു.

ആണ്‍കുട്ടികളില്‍ അലക്‌സ് ജോര്‍ജ്, കിരണ്‍. എസ്, അശ്വിന്‍. ജെ, അഭിഷേക് മാത്യു എന്നിവരടങ്ങിയ സംഘം 3:23.96 സെക്കന്‍ഡിലും പെണ്‍കുട്ടികളില്‍ മിന്നു പി. റോയ്, സാന്ദ്ര. എ.എസ്, ചാന്ദ്‌നി. സി, പ്രസ്‌കില്ല ഡാനിയേല്‍ എന്നിവരടങ്ങിയ ടീം 3:55.09 സെക്കന്‍ഡിലും ഒന്നാമതെത്തി.

കഴിഞ്ഞ ദിവസം 400 മീറ്ററില്‍ സ്വര്‍ണ്ണം നേടിയ പ്രസ്‌കില്ല ഇന്നലെ 800 മീറ്ററിലും റിലേയിലും സ്വര്‍ണ്ണം നേടി ട്രിപ്പിള്‍ തികച്ചു.