ചേര്ത്തല: ഇട്ടി അച്യുതന് വൈദ്യരുടെ തറവാട് പുനരുദ്ധരിക്കാനുള്ള പദ്ധതിക്ക് രൂപരേഖ തയാറാക്കിയതോടെ കടക്കരപ്പള്ളി ടൂറിസം ഭൂപടത്തില് ഇടംപിടിക്കുന്നു.
വീടിന്റെ പുനരുദ്ധാരണത്തിന് 7.40 ലക്ഷം രൂപയുടെ രൂപരേഖയാണ് ആലപ്പുഴ പൈതൃകപദ്ധതി അധികൃതര് സമര്പ്പിച്ചത്.
ലോകപ്രശസ്ത സസ്യശാസ്ത്ര ഗ്രന്ഥമായ ഹോര്ത്തൂസ് ഇന്ഡിക്കൂസ് മലബാറിക്കൂസിന്റെ മുഖ്യരചയിതാവായ ഇട്ടിഅച്യുതന് വൈദ്യരുടെ പൈതൃക ശേഷിപ്പുകളാണ് നാടിനെ സമ്പന്നമാക്കുന്നത്. വൈദ്യരുടെ തറവാട്, കുര്യാല, നട്ടുവളര്ത്തി പരിപാലിച്ച ഔഷധ സസ്യക്കാവ്, വൈദ്യര്ക്ക് ലഭിച്ച പട്ടും വളയും, മരുന്ന് അളക്കാനുപയോഗിച്ചിരുന്ന കഴഞ്ചിക്കോല്, മരുന്ന് അരച്ചിരുന്ന കല്ല് എന്നിവ പിന്മുറക്കാര് സൂക്ഷിക്കുന്നുണ്ട്.
വിനോദസഞ്ചാരികളെ ആകര്ഷിക്കാന് പാകത്തില് കണ്ടല്കാടുകളാല് സമൃദ്ധമാണ് ഇവിടം. കടലോര, ഫാം ടൂറിസത്തിനും അനുകൂലമായ സാഹചര്യമാണുള്ളത്. ഔഷധ മൂല്യമുള്ള കടക്കരപ്പള്ളി വെറ്റിലയും നാടിന്റെ പ്രശസ്തി വര്ദ്ധിച്ചിപ്പിട്ടുണ്ട്.
