തിരുവനന്തപുരം: ജമ്മു കാശ്മീരിനെതിരായ രഞ്ജിട്രോഫി മത്സരത്തില് കേരളത്തിനു ഉജ്ജ്വല വിജയം. 238 റണ്സ് വിജയലക്ഷ്യത്തിനായി ബാറ്റേന്തിയ ജമ്മു കാശ്മീര് 79 റണ്സിനു പുറത്തായി. ഇതോടെ കേരളത്തിന് 158 റണ്സിന്റെ കൂറ്റന് ജയം സ്വന്തമായി. സ്കോര് കേരളം: 219, 191. ജമ്മു കാശ്മീര് 173, 79.
ഏഴു വിക്കറ്റിന് 56 റണ്സ് എന്ന നിലയില് കളി പുനരാരംഭിച്ച ജമ്മുകാശ്മീര് നാലാം ദിനത്തിന്റെ ആദ്യ സെഷനില് തന്നെ പുറത്തായി. രണ്ടാം ഇന്നിംങ്ങ്സില് അഞ്ചു വിക്കറ്റ് വീഴ്ത്തിയ അക്ഷയ് ചന്ദ്രനാണ് ജമ്മു കാശ്മീരിനെ തകര്ത്തത്.രഞ്ജി ട്രോഫിയില് അരങ്ങേറ്റ മത്സരം കളിക്കുന്ന അക്ഷയ് ചന്ദ്രന് മത്സരത്തിലാകെ ഒമ്പതു വിക്കറ്റ് ലഭിച്ചു. ആദ്യ ഇന്നിങ്ങ്സില് സെഞ്ചുറി നേടിയ സഞ്ജു സാംസണാണ് കളിയിലെ കേമന്.
ഈ വിജയത്തോടെ കേരളത്തിന്റെ നോക്കൗട്ട് പ്രതീക്ഷ സജീവമായി.നാലു കളികളില് മൂന്നു വിജയം നേടിയ കേരളത്തിന് 16 പോയിന്റായി. ഗ്രൂപ്പിലെ ആദ്യ രണ്ടു സ്ഥാനക്കാര്ക്ക് മാത്രമെ നോക്കൗട്ടിലേക്ക് പ്രവേശനം ലഭിക്കൂ. കേരളത്തിന്റെ മൂന്നാം വിജയമാണിത്. നേരത്തെ ഝാര്ഖണ്ഡിനെയും രാജസ്ഥാനെയും തോല്പ്പിച്ചിരുന്നു. നാലു കളികളില് മൂന്ന് പോയിന്റ് മാത്രമുളള ജമ്മുകാശ്മീരിന്റെ നോക്കൗട്ട് പ്രതീക്ഷള് അസ്തമിച്ചു.
നാലാം ദിനത്തില് ഇന്നിങ്ങ്സ് തുടങ്ങിയ ജമ്മുകാശ്മീര് 23 റണ്സ് കൂടി കൂട്ടിചേര്ക്കുന്നതിനിടയ്ക്ക് ശേഷിച്ച മൂന്ന് വിക്കറ്റുകളും നഷ്ടമായി.
ക്യാപ്റ്റന് പര്വേസ് റസൂല് (29 പന്തില് 17), പ്രണവ് ഗുപ്ത (88 പന്തില് 11) എന്നിവര്ക്കു മാത്രമേ രണ്ടക്കം കടക്കാനായുള്ളൂ. അഹമ്മദ് ഒമര് (ആറ്), ശുഭം ഖജൂരിയ (ഒന്ന്), ഇയാന് ചൗഹാന് (0), ബന്ദീപ് സിങ് (നാല്), റാം ദയാല് (ഒന്പത്) തുടങ്ങിയവര് അനായാസം കീഴടങ്ങി .
