കൂത്തുപറമ്പ്: കൂത്തുപറമ്പില് ദളിത് യുവാവിനെ തട്ടിക്കൊണ്ടുപോയി വധിക്കാന് ശ്രമിച്ച സംഭവത്തിനു പിന്നില് പത്തംഗ സിപിഎം ക്രിമിനല് സംഘം. പാതിരിയാട് ചേരിക്കല് വലിയപറമ്പത്ത് ഹൗസില് വി.വിജയന്റെ മകന് മഞ്ജുനാഥിനെ (19)യാണ് കഴിഞ്ഞ ദിവസം ഒരു സംഘം സിപിഎമ്മുകാര് ബലമായി ഓട്ടോയില് കയറ്റി കായലോട് കുട്ടിച്ചാത്തന് മഠത്തിനു സമീപത്തെ കാട്ടുപ്രദേശത്ത് കൊണ്ടുപോയി വധിക്കാന് ശ്രമിച്ചത്. കഴിഞ്ഞ ദിവസം ആറു മണിയോടെയാണ് സംഭവം. പാച്ചപ്പൊയ്ക ശ്രീനാരായണമഠത്തിന് സമീപം സുഹൃത്ത് വിപിനോടൊപ്പം ബൈക്ക് റിപ്പയറിന് പോയ മഞ്ജുനാഥിനെ സിപിഎം സംഘം ഓട്ടോയുമായെത്തി തട്ടിക്കൊണ്ടുപോവുകയായിരുന്നു. വേഗം രക്ഷപ്പെട്ടില്ലെങ്കില് ജീവന് കിട്ടില്ലെന്ന് വിപിനിനെ അക്രമികള് ഭീഷണിപ്പെടുത്തുകയും ചെയ്തു. തുടര്ന്ന് കായലോട് കുട്ടിച്ചാത്തന് മഠത്തിന് സമീപത്തെ ആളൊഴിഞ്ഞ പറമ്പിലെത്തിച്ച് ക്രൂരമായി മര്ദ്ദിക്കുകയായിരുന്നു. ഓടിരക്ഷപ്പെടാന് ശ്രമിച്ച മഞ്ജുനാഥിനെ ഇരുമ്പ് പൈപ്പുകൊണ്ട് അടിച്ച് വീഴ്ത്തി. തുടര്ന്ന് വീണ്ടും മര്ദ്ദിച്ചു. അടിയേറ്റ് വാരിയെല്ലുള്പ്പെടെ തകര്ന്ന നിലയിലാണ്. അക്രമത്തിന് ശേഷം മഞ്ജുനാഥിന്റെ മൊബൈല് ഫോണ് ഉള്പ്പടെ അക്രമികള് കൊണ്ടുപോയി. സംഭവം വിപിന് സുഹൃത്തുക്കളെ അറിയിച്ചതിനെ തുടര്ന്ന് സ്ഥലത്തെത്തിയ പോലീസാണ് മഞ്ജുനാഥിനെ ആശുപത്രിയിലെത്തിച്ചത്. തലശ്ശേരിയിലെ സ്വകാര്യ ആശുപത്രിയില് ചികിത്സയില് കഴിയുന്ന മഞ്ജുനാഥ് അപകടനില തരണം ചെയ്തിട്ടുണ്ട്.
ആര്എസ്എസ് പ്രവര്ത്തകനായ മഞ്ജുനാഥിനെതിരെ നേരത്തെയും സിപിഎം സംഘം അക്രമം നടത്തിയിരുന്നു. 2016 ഒക്ടോബര് 10 ന് സിപിഎം സംഘം മഞ്ജുനാഥിന്റെ വീട് പൂര്ണ്ണമായും അടിച്ച് തകര്ത്തിരുന്നു. സിപിഎം നേതൃത്വത്തിലുള്ള ക്വട്ടേഷന് സംഘങ്ങളുടെ വിഹാര കേന്ദ്രമാണ് കായലോട് പ്രദേശം. പോലീസ് പോലും ഭയപ്പാടോടെ കാണുന്ന കായലോട് പ്രദേശത്തുള്ള സിപിഎം ക്രിമിനല്സംഘം നിരവധി ആര്എസ്എസ് പ്രവര്ത്തകരെ അക്രമിച്ചിട്ടുണ്ട്.
പാച്ചപ്പൊയ്ക ചാത്തന്മുക്കിലെ എളഞ്ചേരി ഹൗസില് ദാസന്റെ മകന് പ്രസൂണ്(28), മംഗലോട്ട്ചാല് ചാമാളയില് രാജീവന്റെ മകന് അഖില്, കായലോട് കുട്ടിച്ചാത്തന്മഠം ജനാര്ദ്ദനന്റെ മകന് അരുണ്, പാച്ചപ്പൊയ്ക ചാത്തന്മുക്ക് ഗോവിന്ദന്റെ മകന് രഞ്ജിത്ത്, ചാത്തന്മക്ക് കുന്നുമ്മല് ഹൗസില് പി.കെ.സുരേന്ദ്രന്റെ മകന് സുമേഷ്, ചാത്തന്മുക്ക് ചേലേരി ഹൗസില് പുരുഷുവിന്റെ മകന് അരുണ്, ചാത്തന്മുക്ക് രാജീവന്റെ മകന് കിരണ്, പാച്ചപ്പൊയ്കയിലെ ഗംഗാധരന്റെ മകന് അഖിലേഷ്, മൗവ്വേരി പുരുഷുവിന്റെ മകന് നിഖില് എന്നിവരുടെ നേതൃത്വത്തിലുള്ള സംഘമാണ് അക്രമം നടത്തിയത്.
