പാരീസ്: ആഴ്സണല് യൂറോപ്പ ലീഗിന്റെ നോക്കൗട്ടില് കടന്നു. അതേസമയം എവര്ട്ടണ് പുറത്തായി. ഗ്രൂപ്പ് എച്ച് മത്സരത്തില് റെഡ് സ്റ്റാര് ബെല്ഗ്രേഡിനെ ഗോള് രഹിത സമനിലയില് തളച്ചതോടെയാണ് ആഴ്സണല് നോക്കൗട്ടില് കടന്നത്. രണ്ട് മത്സരങ്ങള് കൂടി ശേഷിക്കെയാണ് അവര്ക്ക് നോക്കൗട്ട് ഉറപ്പായത്.
ലിയോണിനോട് എതിരില്ലാത്ത മൂന്ന് ഗോളുകള്ക്ക് തോറ്റതോടെയാണ് എവര്ട്ടണ് യൂറോപ്പ ലീഗില് നിന്ന് പുറത്തായത്. ട്രറോര്, ഹൗസീം ഔവര് , ഡിപെ എന്നിവരാണ് ലിയോണിനായി ഗോളുകള് നേടിയത്. ശേഷിക്കുന്ന രണ്ട് മത്സരങ്ങളില് ഒരു പോയിന്റു കൂടി നേടിയാല് ലിയോണിന് നോക്കൗട്ടില് കടക്കാനാകും.
ഉക്രെയിന് ടീമായ ഡൈനാമോ കീവ് നോക്കൗട്ടില് കടന്നു. ഗ്രൂപ്പ് ബിയില് സ്വിറ്റ്സര്ലന്ഡിന്റെ യങ്ങ് ബോയ്സിനെ ഏകപക്ഷീയമായ ഒരു ഗോളിന് തോല്പ്പിച്ചാണ് ഡൈനാമോ നോക്കൗട്ടിലെത്തിയത്. ഗ്രൂപ്പ് എയില് സാല്വിയ പ്രേഗിനെ മടക്കമില്ലാത്ത രണ്ട് ഗോളുകള്ക്ക് തോല്പ്പിച്ച് വിയ്യാറയല് നോക്കൗട്ടില് കടക്കാനുള്ള സാധ്യത നിലനിര്ത്തി.
ഗ്രൂപ്പ് കെ യില് ലാസിയോ ഏകപക്ഷീയമായ ഒരു ഗോളിന് നൈസിനെ തോല്പ്പിച്ചു. ഏഴുതവണ യൂറോപ്യന് ചാമ്പ്യന്മാരായ എസി മിലാനെ എഇകെ ഏതന്സ് ഗോള് രഹിത സമനിലയില് തളച്ചു.
