ഇരിട്ടി: എടൂര് കാരാപറമ്പ്വീര്പ്പാട് റോഡിനോടുള്ള അവഗണനക്കെതിരെ ജനകീയ പ്രക്ഷോഭം നടത്തുന്നതിന് പ്രതിഭ പുരുഷ സ്വയംസഹായസംഘം യോഗം തീരുമാനിച്ചു. പ്രധാനമന്ത്രി സഡക് യോജനയില് പ്രവൃത്തി പൂര്ത്തീകരിച്ച് ജില്ലാ പഞ്ചായത്ത് കൈമാറിയ റോഡ് കാല്നടയാത്ര പോലും പറ്റാത്ത വിധത്തില് തകര്ന്നിരിക്കുകയാണ്. അഞ്ചിലധികം ബസുകള് സര്വീസ് നടത്തുന്ന ഈ റൂട്ടില് റോഡിന്റെ ഇന്നത്ത ശോചനീയാവസ്ഥ മൂലം ബസുകള് സര്വീസ് നിര്ത്താന് പോവുകയാണ്.
വീര്പ്പാട് എസ്എന് കോളജ്, എടൂര് ഹയര് സെക്കന്ഡറി സ്കൂള്, ആറളം പഞ്ചായത്ത് ഓഫീസ്, വില്ലേജ് ഓഫിസ് തുടങ്ങിയ സ്ഥാപനങ്ങളിലേക്ക് പോകുന്നതിന് മേഖലയിലുള്ള നൂറുകണക്കിനാളുകള് ഉപയോഗിക്കുന്നതാണ് ഈ റോഡ്. കാലവര്ഷം ആരംഭിച്ചതുമുതല് ഈ റൂട്ടില് ഓട്ടോറിക്ഷകള് സര്വീസ് നിര്ത്തിവച്ചിരിക്കുകയാണ്. 2017-18 വര്ഷത്തെ പദ്ധതിയില് കണ്ണൂര് ജില്ലാ പഞ്ചായത്ത് 30 ലക്ഷം രൂപ വകയിരുത്തി റോഡ് മെയിന്റനന്സിന് എസ്റ്റിമേറ്റ് തയ്യാറാക്കി നടപടികള് ആരംഭിച്ചെങ്കിലും ഫണ്ടില്ലെന്ന കാരണം പറഞ്ഞ് പദ്ധതി ഉപേക്ഷിച്ചു. പ്രതിഭ എസ്എച്ച്ജി വിവരാവകാശ നിയമപ്രകാരം നല്കിയ അപേക്ഷയില് ജില്ലാ പഞ്ചായത്തില് നിന്നും ഈ വര്ഷത്തെ പദ്ധതിയില് ഒരു രൂപ പോലും വകയിരിത്തിയിട്ടില്ലെന്ന് അറിയാന് കഴിഞ്ഞു. ഈ അവഗണനക്കെതിരെ നാട്ടുകാരുടെ സഹകരണത്തോടെ സമരം നടത്താനാണ് തീരുമാനം. പ്രസിഡന്റ് ടി.ടി.തോമസ്, സെക്രട്ടറി തോമസ് തകിടിയേല്, ബിന്സ് തോണാട്ട്, ബിജു കുറ്റിക്കാട്ടില് എന്നിവര് പ്രസംഗിച്ചു.
