പോത്തന്കോട്: സേവന പ്രവര്ത്തനങ്ങളില് മികവ് പുലര്ത്തി ഒരുഗ്രാമത്തിന്റെ വഴികാട്ടിയായി മാറിയിരിക്കുകയാണ് പണിമൂല വിവേകാനന്ദ സേവാകേന്ദ്രം ചാരിറ്റബിള് ട്രസ്റ്റ്. വിവാഹസദ്യ വിളമ്പിക്കിട്ടുന്ന വരുമാനം സേവനപ്രവര്ത്തനങ്ങള്ക്കായി മാറ്റിവച്ചാണ് നാടിനും മറ്റുള്ളവര്ക്കും ഇവര് മാതൃകയാകുന്നത്.
2013ല് ആരംഭിച്ച സേവാകേന്ദ്രം അഞ്ചാം വര്ഷത്തിലേക്ക് കടക്കുകയാണ്. പണിമൂല കേന്ദ്രമാക്കി പ്രവര്ത്തിക്കുന്ന സേവാകേന്ദ്രത്തിന് എഴുപതംഗങ്ങളുള്ള ഭരണസമിതിയും ഉണ്ട്. യുവതലമുറയുടെ സമഗ്രമായ ഉന്നമനത്തിന് വിവിധതലങ്ങളില് പരിശീലനങ്ങള്, പുരസ്കാരങ്ങള്, സഹായപ്രവര്ത്തനങ്ങള്, അനുമോദനങ്ങള് തുടങ്ങിയ പദ്ധതികള് നടപ്പിലാക്കിവരുന്നു.
സേവാകേന്ദ്രത്തിന്റെ പ്രധാന വരുമാനമാര്ഗം ഇതിലെ പ്രവര്ത്തകര് വിവാഹസദ്യ വിളമ്പുന്നതിലൂടെ ലഭിക്കുന്നതാണ്. വരുമാനം പൂര്ണമായും സേവാകേന്ദ്രത്തിലേക്ക് നല്കുന്നു. സേവാകേന്ദ്രത്തിന്റെ പ്രവര്ത്തനം തുടങ്ങിയപ്പോള് തന്നെ മൂന്ന് നിര്ധന കുടുംബങ്ങള്ക്ക് ചികിത്സാ ധനസഹായം നല്കി. ഒരു കുട്ടിയുടെ പഠനചെലവ് പൂര്ണമായി സേവാകേന്ദ്രം വഹിക്കുന്നു. പഠനത്തില് മികവ് തെളിയിച്ച രണ്ടുപേര്ക്ക് ഉപഹാരം നല്കി. 2014ല് പണിമൂല ക്ഷേത്രോത്സവത്തോടനുബന്ധിച്ച് അഞ്ചുപേര്ക്ക് ചികിത്സാ ധനസഹായം, രണ്ടു കുട്ടികളുടെ പഠനച്ചെലവ്, 110 കുട്ടികള്ക്ക് പഠനോപകരണവിതരണം, മുത്തച്ഛന്മാരെയും മുത്തശ്ശിമാരെയും ആദരിക്കല് എന്നിവ സംഘടിപ്പിച്ചു.
2015 ല് കുടുംബസഹായ നിധിയിലേക്ക് 15,000 രൂപ നല്കി. ചികിത്സാധനസഹായമായി ഒന്പത് പേര്ക്ക് 66,000 രൂപ നല്കി. വിദ്യാജ്യോതി ധനസഹായമായി മൂന്നു കുട്ടികളുടെ പഠനച്ചെലവ് പൂര്ണമായി സേവാകേന്ദ്രം വഹിച്ചു. പാഠ്യശ്രീ പദ്ധതിയില് തൊണ്ണൂറ് കുട്ടികള്ക്ക് പഠനോപകരണങ്ങള് നല്കി. ജ്ഞാനശക്തി പുരസ്കാരമായി ഒരു കുട്ടിക്ക് പഠനമികവിന് പുരസ്കാരം നല്കി. നവമി ആദരവില് മുതിര്ന്ന അഞ്ചുപേരെ ആദരിച്ചു. വിദ്യാരംഭത്തില് പണിമൂല ക്ഷേത്രത്തില് വിദ്യാരംഭം കുറിച്ച നൂറ്റിഅറുപത് കുട്ടികള്ക്ക് പഠനോപകരണങ്ങള് നല്കി. ഒന്നരലക്ഷം രൂപ മുടക്കി മെഡിക്കല് ക്യാമ്പ് നടത്തി. 2016 ല് ചികിത്സാ ധനസഹായമായി 27,000 രൂപ നല്കി. തിരുവല്ലം പൂര്ണശ്രീ ബാലികാസദനത്തില് ഒരു ദിവസത്തെ ക്യാമ്പ് സംഘടിപ്പിച്ചു. ഒരു വാഷിംഗ്മെഷീനും വാട്ടര് പ്യൂരിഫയറും അവര്ക്കു വാങ്ങി നല്കി. ലോക പരിസ്ഥിതിദിനത്തില് 1500 വൃക്ഷത്തൈകള് വിതരണം ചെയ്തു. ഇരുന്നൂറില്പരം രോഗികള്ക്ക് സേവാകേന്ദ്രം പ്രവര്ത്തകര് രക്തം ദാനംചെയ്തു.
2017ലെ വാര്ഷികാഘോഷം കോട്ടൂരില് പ്രവര്ത്തിക്കുന്ന അഗസ്ത്യ ബാലികാസദനത്തില് സേവാകേന്ദ്രത്തിന്റെ നേതൃത്വത്തില് ഗ്രാമത്തിലെ മുഴുവന് ആള്ക്കാരുടെയും സഹകരണത്തോടെ ഏകദിന ശിബിരം സംഘടിപ്പിച്ചു. 45,000 രൂപയുടെ സഹായപദ്ധതികള് അവര്ക്ക് നല്കി.
