കുന്നത്തൂര്: താലൂക്കിന്റെ വിവിധ ഭാഗങ്ങളില് മോട്ടോര് വാഹനവകുപ്പ് നടത്തിയ പരിശോധനയില് നിയമലംഘനം നടത്തിയ നിരവധി സ്വകാര്യബസുകള് പിടിച്ചെടുത്തു.
സ്വകാര്യബസുകളെക്കുറിച്ച് വിവിധ കോണുകളില് നിന്ന് പരാതികള് ലഭിച്ചതിന്റെ അടിസ്ഥാനത്തില് കുന്നത്തൂര് ജോയിന്റ് ആര്ടി ഓഫീസിലെ മോട്ടോര് വെഹിക്കിള് ഇന്സ്പെക്ടര്മാരായ രാംജി കെ.കരണ്, എം.ജി.മനോജ് എന്നിവരുടെ നേതൃത്വത്തിലാണ് പരിശോധന നടത്തിയത്.
ഏഴു സ്വകാര്യബസുകളാണ് അധികൃതരുടെ പിടിയിലായത്. ഇതില് ഇന്ഷുറന്സ് ഇല്ലാതെ സര്വ്വീസ് നടത്തിവന്ന പുത്തനമ്പലം-ഭരണിക്കാവ് ബസ് പിടിച്ചെടുത്ത് ശൂരനാട് പോലീസിന് കൈമാറി.
പകുതിയ്ക്ക് ട്രിപ്പ് മുടക്കുന്നതായും സമയക്രമം പാലിയ്ക്കാത്തതും വിദ്യാര്ത്ഥികളെ കയറ്റാതെ പോകുന്നവയും റൂട്ട് മാറി ഓടിയതുമായ ബസുകളാണ് പിടിച്ചെടുത്തത്. മിക്ക ബസുകളിലും കണ്ടക്ടര് ലൈസന്സ് ഇല്ലാത്തവരാണ് ജോലി ചെയ്യുന്നതെന്നും പരിശോധനയില് തെളിഞ്ഞു. കൊല്ലം ആര്ടിഒയുടെ പ്രത്യേക നിര്ദ്ദേശപ്രകാരം സ്വകാര്യബസുകളില് പരിശോധന തുടരുമെന്നും നിയമലംഘനം നടത്തിയ ബസുകളുടെ പെര്മിറ്റ് റദ്ദാക്കാന് നടപടി സ്വീകരിച്ച് വരികയാണെന്നും ജോയിന്റ് ആര്ടിഒ എച്ച്.അന്സാരി അറിയിച്ചു.
