അഞ്ചരക്കണ്ടി: കാര്ഷിക സമൃദ്ധിയുടെ ആഘോഷമായ തുലാപ്പത്തിന്റെ ഗതകാല സ്മരണങ്ങളുണര്ത്തി സ്ക്കൂള് വിദ്യാര്ത്ഥികള് അവില് കുഴച്ചു. അഞ്ചരക്കണ്ടി ഗുരുനിത്യാ സ്കൂളിലെ സ്ക്കൂള് വിദ്യാര്ത്ഥികളാണ് പരമ്പരാഗതരീതിയില് അവില്കുഴച്ചത്.
കുട്ടികള് കൊണ്ടുവന്ന തേങ്ങ അവര് തന്നെ കൂട്ടമായിരുന്ന് ചിരവി, വെല്ലവും, അവിലും, പഴവും ചേര്ത്ത് പരമ്പരാഗതരീതിയില് അവില്കുഴച്ചു. പരിപാടി കുട്ടികള്ക്ക് അനുഭവമായി മാറി. മനുഷ്യന് പ്രകൃതിയുടെ ഭാഗമാണെന്നും ഓരോ ആചാരങ്ങളും ആരോഗ്യത്തിന്റെ ഭാഗമാണെന്ന തിരിച്ചറിവുണ്ടക്കുന്നതായി പരിപാടി.
ചടങ്ങില് പ്രിന്സിപ്പല് സഹദേവന്, വൈസ് പ്രിന്സിപ്പാള് സബീന എന്നിവര് നേതൃത്വം നല്കി. സലീന ടീച്ചര് തുലാപത്തിന്റെ പ്രാധാന്യം കുട്ടികള്ക്ക് വിശദീകരിച്ചുകൊടുത്തു. ഗുരുനിത്യാ സ്കൂളിലെ അദ്ധ്യാപകരും വിദ്യാര്ത്ഥികളും പരിപാടിയില് സംബന്ധിച്ചു.
പഴയകാലത്ത് കൊയ്ത്ത് കഴിഞ്ഞ പുത്തന് നെല്ല് തലേദിവസം തിളപ്പിച്ചു വയ്ക്കുകയും ആ നെല്ല് മണ്ചട്ടിയില് വറുത്ത് ഉരലില് ഇടിച്ച് അവിലുണ്ടാക്കുമായിരുന്നു. ഏറ്റവും പോഷകഗുണമുള്ള ആഹാരമാണ് അവില്. തവിടോടുകൂടിയ അവില് വിറ്റാമില്-ബിയുടെ കലവറയാണ്. യാത്രയില് കൊണ്ടു പോവുന്നതിനും നമുക്ക് ഏറ്റവും എളുപ്പത്തില് വിശപ്പ് മാറ്റാന് ഉപകരിക്കുന്നതുമായ ഒരു ആഹാരം കൂടിയാണ് അവില്. മൂല്യവര്ദ്ധിത ഉല്പന്നങ്ങളില് ഉള്പ്പെടുത്തേണ്ട ഒരു ആഹാരമാണിത്. അതുകൊണ്ട് തന്നെയാണ് പത്താമുദയനാളില് അവിലിന് പ്രത്യേക പ്രാധാന്യം നല്കിയിരുന്നത്.
