രാജസ്ഥാനനെതിരായ രഞ്ജി മത്സരത്തില് സെഞ്ചുറി നേടിയ സക്സേന
തിരുവനന്തപുരം: ഓള്റൗണ്ട് പ്രകടനവുമായി തിളങ്ങിയ ജലജ് സക്സേനയുടെ മിന്നുന്ന പ്രകടനത്തിന്റെ കരുത്തില് രാജസ്ഥാനെതിരായ രഞ്ജി മത്സരത്തില് കേരളം ശക്തമായ നിലയില്. രാജസ്ഥാന്റെ ഒന്നാമിന്നിങ്ങ്സില് എട്ടു വിക്കറ്റു വീഴ്ത്തിയ സക്സേന, പിന്നീട് സെഞ്ചുറിയടിച്ച് കേരളത്തിന്റെ രണ്ടാമിന്നിങ്ങ്സിനു നട്ടെല്ലായി.
92 റണ്സിന്റെ ഒന്നാമിന്നിങ്സ് ലീഡ് നേടിയ കേരളം ഇന്നലെ കളിനിര്ത്തുമ്പോള് രണ്ടാമിന്നിങ്സില് രണ്ടു വിക്കറ്റ് നഷ്ടത്തില് 217 റണ്സെടുത്തിട്ടുണ്ട്. ഇതോടെ ഒരു ദിവസവും എട്ടു വിക്കറ്റും ശേഷിക്കെ കേരളത്തിന് 309 റണ്സിന്റെ ലീഡായി. സക്സേനയായിരുന്നു ഇന്നലെ കേരളത്തിന്റെ ഹീറോ.
കേരളത്തിന്റെ ഒന്നാം ഇന്നിങ്സ് സ്കോറായ 335 റണ്സിനു മുന്നില് രാജസ്ഥാന് 243 റണ്സിന് പുറത്തായി. 85 റണ്സിനു എട്ടു വിക്കറ്റ് വീഴ്ത്തിയ സക്സേനയാണ് സന്ദര്ശകരെ തകര്ത്തത്. അര്ധസെഞ്ചുറി കുറിച്ച ദിഷാന്ത് യാഗ്നിക്കാണ്(62) രാജസ്ഥാനെ വന് തകര്ച്ചയില്നിന്ന് രക്ഷിച്ചത്.
രണ്ടാമിന്നിങ്ങ്സില് കേരളത്തിന്റെ തുടക്കം തകര്ച്ചയോടെയായിരുന്നു. എന്നാല് സെഞ്ചുറി നേടിയ സക്സേന(102 നോട്ടൗട്ട്)യുടെയും സഞ്ജു സാംസണി(72 നോട്ടൗട്ട്)ന്റെയും മികവില് കേരളം മികച്ച ലീഡിലേക്ക് നീങ്ങുകയായിരുന്നു.
ഓപ്പണര് വിഷ്ണു വിനോദും (8) രോഹന് പ്രേമും(24 ) തുടക്കത്തില്ത്തന്നെ പുറത്തായെങ്കിലും മൂന്നാം വിക്കറ്റ് കൂട്ടുകെട്ടില് 159 റണ്സ് കൂട്ടിച്ചേര്ത്ത സക്സേന-സഞ്ജു സഖ്യം കേരളത്തിന് കരുത്തു പകര്ന്നു. 146 പന്തില് നിന്ന് ഒമ്പതു ബൗണ്ടറികളടിച്ചാണ് സക്സേന 102 റണ്സെടുത്തത്. 90 പന്തുകള് നേരിട്ട സഞ്ജു ഇതുവരെ ഏഴു ബൗണ്ടറികള് അടിച്ചു.
