പൂനെ: സമ്മര്ദത്തില്പ്പെട്ട ഇന്ത്യന് ക്രിക്കറ്റ് ടീം അടുത്തകാലത്ത് ഇതാദ്യമായി അഗ്നിപരീക്ഷയെ നേരിടുകയാണ്. ഇന്നത്തെ രണ്ടാം ഏകദിന മത്സരത്തില് തോറ്റാല് മൂന്ന് മത്സരങ്ങളുടെ പരമ്പര ന്യൂസിലന്ഡിന് അടിയറവയ്ക്കേണ്ടിവരും.
ആദ്യ മത്സരത്തില് അപ്രതീക്ഷിത തോല്വി ഏറ്റുവാങ്ങിയ ഇന്ത്യ പരമ്പരയില് 0-1 ന് പിന്നിട്ടു നില്ക്കുകയാണ്. ഇന്ന് ജയിച്ചാലേ പരമ്പരയില് തിരിച്ചുവരാനാകൂ. അവസാന ആറു പരമ്പരകളില് വിജയം നേടിയ ഇന്ത്യ ഇതാദ്യമായാണ് ഗുരുതര പ്രതിസന്ധി നേരിടുന്നത്.
മികച്ച ഫോമില് നില്ക്കുന്ന ഇന്ത്യയെ മുംബൈയിലെ ആദ്യ മത്സരത്തില് ന്യൂസിലന്ഡ് അട്ടിമറിക്കുമെന്ന് ആരും കരുതിയില്ല. ചാമ്പ്യന്സ് ട്രോഫിക്ക് ശേഷം ആദ്യ മത്സരത്തിനിറങ്ങിയ ന്യൂസിലന്ഡ് അവസരത്തിനൊത്തുയര്ന്നു. റോസ് ടെയ്ലറും ടോം ലാത്തവും 200 റണ്സിന്റെ കൂട്ടുകെട്ടുണ്ടാക്കി വിജയം പിടിച്ചെടുത്തു. സ്പിന്നര്മാരായ യുവേന്ദ്ര ചഹലിനെയും കുല്ദീപ് യാദവിനെയും അവര് ഭംഗിയായി കൈകാര്യം ചെയ്തു.
മുംബൈയിലെ വാങ്കഡേ സ്റ്റേഡിയത്തില് ഇന്ത്യ നിറം മങ്ങി. ക്യാപ്റ്റന് കോഹ് ലി സെഞ്ചുറി കുറിച്ചെങ്കിലും കൂട്ടുകാരില് നിന്ന് വേണ്ടത്ര പിന്തുണ ലഭിച്ചില്ല. ഓപ്പണര്മാരായ ശിഖര് ധവാനും രോഹിത് ശര്മയും ന്യൂസിലന്ഡിന്റെ പേസ് ബൗളിങ്ങില് അനായാസം കീഴടങ്ങി.
നാലാം നമ്പര് ബാറ്റിങ്ങ് സ്ഥാനം ഇപ്പോഴും ടീം മാനേജ്മെന്റിന് ആശങ്കയുണ്ടാക്കുന്നുണ്ട്.2015 നു ശേഷം 11 ബാറ്റ്സ്മാന്മാരെ ഈ സ്ഥാനത്ത് പരീക്ഷിച്ചിരുന്നു. ഞായറാഴ്ച ഈ സ്ഥാനത്ത് കളിച്ച കേദാര് യാദവും പരാജയപ്പെട്ടു.അതേസമയം അഞ്ചാമനായി കളിക്കാനിറങ്ങിയ ദിനേശ് കാര്ത്തിക്ക് തിളങ്ങി.കാര്ത്തിക്ക് ഇന്നും അവസാന ഇലവനിലുണ്ടാകുമെന്നാണ് പ്രതീക്ഷ.
ആദ്യ മത്സരത്തില് വിജയിച്ച ന്യൂസിലന്ഡ് തികഞ്ഞ ആത്മവിശ്വാസത്തിലാണ്. ലാത്തവും ടെയ്ലറുമൊക്കെ അടിച്ചുകളിച്ചാല് പരമ്പര ജയം ഉറപ്പാകും.
