തലശ്ശേരി: ജില്ലാ കലക്ടറുടെ നേതൃത്വത്തില് താലൂക്ക് തലത്തില് നടക്കുന്ന ജനസമ്പര്ക്ക പരിപാടിയുടെ ഭാഗമായി തലശ്ശേരിയില് നടന്ന പരിപാടിയില് ലഭിച്ചത് 320 പരാതികള്. 60 ഹരജികളില് തത്സമയം തീര്പ്പ് കല്പിച്ചു. ബാക്കിയുള്ളവ വിവിധ വകുപ്പുകള്ക്ക് തുടര്നടപടിക്കായി കൈമാറി. മിനി സിവില് സ്റ്റേഷനില് ജില്ലാ കലക്ടര് മീര് മുഹമ്മദലിയുടെ നേതൃത്വത്തിലായിരുന്നു പരാതി പരിഗണിച്ചത്. ഇന്നലെ രാവിലെ പത്തരയ്ക്ക് ആരംഭിച്ച ജനസമ്പര്ക്ക പരിപാടി വൈകിട്ട് അഞ്ചേകാലിനാണ് സമാപിച്ചത്.
നഗരസഭ ചെയര്മാന്മാരായ സി.കെ.രമേശന്, എം.സുകുമാരന്, കെ.വി.റംല, പി.ബാലന്, സബ്കലക്ടര് ആര്.ചന്ദ്രശേഖരന്, അസി. കലക്ടര് ആസിസഫ് യൂസഫ്, തഹസില്ദാര് ടി.വി. രഞ്ജിത്ത്, ലാന്റ് റെക്കോഡ് തഹസില്ദാര് പി.പി.സത്യനാഥന്, പഞ്ചായത്ത് ഡപ്യൂട്ടി ഡയരക്ടര് എം.കെ.അശോകന്, ഡിഎംഒ നാരായണ നായിക്, ജനറല് ആശുപത്രി ഡപ്യൂട്ടി സുപ്രണ്ട് ഡോ.വി.കെ.രാജീവന്, വില്ലേജ് ഓഫീസര്മാര്, പഞ്ചായത്ത് പ്രസിഡന്റ്, സെക്രട്ടറി, വിവിധ വകുപ്പ് മേധാവികള് എന്നിവരും പങ്കെടുത്തു.
168 ഹരജികളാണ് ജനസമ്പര്ക്ക പരിപാടിക്കായി നേരത്ത ലഭിച്ചത്. ജനസമ്പര്ക്ക വേദിയില് വച്ച് പുതുതായി 152 പരാതിയും ലഭിച്ചു. റേഷന്കാര്ഡ് സംബന്ധമായ പരാതികളായിരുന്നു ഭൂരിഭാഗവും. ഭിന്നശേഷിക്കാരുടെ ജോലി, ലാന്റ്ബോര്ഡ് പട്ടയം, ഭര്ത്താവ് മരിച്ച സ്ത്രീകള്ക്കുള്ള ദേശീയകുടുംബക്ഷേമപദ്ധതി സഹായം, വിദ്യാഭ്യാസലോണ് എഴുതിതള്ളല്, വീട് നിര്മാണം തുടങ്ങിയ പരാതികളുമുണ്ടായി. ഹരജികളിലെ 45 ദിവസത്തിനകം തീര്പ്പ് കല്പ്പിക്കുമെന്നും ഇതേക്കുറിച്ചുള്ള കാര്യങ്ങള് അവലോകനം ചെയ്യാന് 45ാം ദിവസം താലൂക്ക് കോണ്ഫറന്സ്ഹാളില് യോഗം ചേരുമെന്നും ജില്ലാ കലക്ടര് പറഞ്ഞു.
