ഒന്റാറിയോ: കഴിഞ്ഞ ക്രിസ്മസ് ഒഴിവുകാലത്ത് പള്ളിയില് നിന്ന് കുട്ടികളുടെ ലൈംഗികദൃശ്യങ്ങള് സോഷ്യല് മീഡിയയില് പോസ്റ്റ് ചെയ്ത വത്തിക്കാനിലെ മുതിര്ന്ന പാതിരിക്കെതിരെ കനേഡിയന് പോലീസ് അറസ്റ്റ് വാറണ്ട് പുറപ്പെടുവിച്ചു.
മൊണ്സിഞ്ഞോര് പദവിയില് പ്രവര്ത്തിക്കുന്ന, അമ്പതു വയസുകാരനായ കാര്ലോ കപ്പേലക്കെതിരെയാണ് വാറണ്ട്. വത്തിക്കാന്റെ നയതന്ത്ര ഉദ്യോഗസ്ഥനായി ഇന്ത്യയടക്കം വിവിധ രാജ്യങ്ങളില് പ്രവര്ത്തിച്ചിട്ടുണ്ട് കപ്പേല.
കഴിഞ്ഞ ക്രിസ്മസ് കാലത്ത് കാനഡിലെ ഒന്റേറിയോയിലുള്ള വിന്ഡ്സര് എന്ന പ്രദേശത്തെ പള്ളിയില് കപ്പേല പ്രാര്ഥിക്കാന് എത്തിയിരുന്നു. ഡിസംമ്പര് 24നും 27നും ഇടയിലുള്ള ഒരു ദിവസം കുട്ടികളുടെ ലൈംഗിക ദൃശ്യങ്ങള് സോഷ്യല് മീഡിയയില് അപ്ലോഡു ചെയ്തതതിനെക്കുറിച്ച് പരാതി കിട്ടിയിരുന്നു. ഇതെക്കുറിച്ചുള്ള അന്വേഷണമാണ് വത്തിക്കാനിലെ മുതിര്ന്ന മൊണ്സിഞ്ഞോറില് എത്തിയത്.
കനേഡിയന് പോലീസ് കേസെടുത്ത ഘട്ടത്തില് അമേരിക്കയില് പ്രവര്ത്തിക്കുകയായിരുന്ന കപ്പേലയെ വത്തിക്കാന് തിരിച്ചു വിളിച്ചിരുന്നു. എന്നാല് നയതന്ത്ര പരിരക്ഷ ഒഴിവാക്കണം എന്ന പോലീസിന്റെ ആവശ്യം വത്തിക്കാന് അംഗീകരിച്ചിട്ടില്ല. ഈ പരിരക്ഷയുള്ളപ്പോള് അറസ്റ്റ് ചെയ്യാനാവില്ല. ആഭ്യന്തര അന്വേഷണം നടത്തുകയാണെന്നും അതിനു ശേഷം പോലീസ് അന്വേഷണത്തോടു സഹകരിക്കുന്ന കാര്യം തീരുമാനിക്കുമെന്നുമാണ് വത്തിക്കാന്റെ നിലപാട്.
