ന്യൂദല്‍ഹി: നോട്ട് അസാധുവാക്കലിനെയും ചരക്ക് സേവന നികുതി നടപ്പാക്കിയതിനെയും വിമര്‍ശിച്ച മുന്‍ കേന്ദ്ര ധനമന്ത്രി സിന്‍ഹയ്‌ക്ക് മറുപടിയുമായി മകനും കേന്ദ്ര മന്ത്രിയുമായ ജയന്ത് സിന്‍ഹ.
കേന്ദ്ര നടപടികള്‍ ഉപരിപ്ലവമല്ല. അവയെല്ലാം ഘടനാപരമായ മാറ്റങ്ങളാണ്, അവയുടെ ഫലങ്ങള്‍ കുറച്ചു മാസങ്ങള്‍ കൊണ്ട് വിലയിരുത്താനാവില്ല, ദീര്‍ഘകാലം കൊണ്ടേ അവയുടെ ഫലങ്ങള്‍ നമുക്ക് ലഭിക്കൂ, ഭാവിയില്‍ പുതിയ, സുതാര്യമായ, കരുത്തുള്ള സമ്പദ് വ്യവസ്ഥയാകും നമ്മുടേത്. കേന്ദ്ര വ്യോമയാന സഹമന്ത്രിയായ ജയന്ത് സിന്‍ഹ ടൈംസ് ഓഫ് ഇന്ത്യയിലെഴുതിയ ലേഖനത്തില്‍ വ്യക്തമാക്കി. കഴിഞ്ഞ പുനഃസംഘടനയ്‌ക്കു മുമ്പ് ധനകാര്യ സഹമന്ത്രിയായിരുന്നു ജയന്ത്.
കേന്ദ്രം സാമ്പത്തിക രംഗത്ത് ഘടനാപരമായ മാറ്റങ്ങളാണ് വരുത്തുന്നത്. പുതിയ ഇന്ത്യയ്‌ക്ക് ഇത് അത്യാവശ്യമാണ്. ലക്ഷക്കണക്കിനാളുകള്‍ക്ക് മികച്ച തൊഴിലവസരം നല്‍കാന്‍ ഇത് ഉപകരിക്കും- ജയന്ത് സിന്‍ഹ പറഞ്ഞു. പുതിയ സമ്പദ്‌വ്യവസ്ഥ കൂടുതല്‍ സുതാര്യമായിരിക്കും. ആഗോളതലത്തില്‍ മത്സരക്ഷമമായിരിക്കും, പുതിയ ആശയങ്ങളില്‍ അധിഷ്ഠിതമായിരിക്കും, കൂടുതല്‍ തുല്യതയുള്ളതായിരിക്കും. ഇന്ത്യക്കാര്‍ക്ക് മികച്ച ജീവിതം പ്രദാനം ചെയ്യുന്നതാകും,ലേഖനത്തില്‍ പറയുന്നു.
കേന്ദ്ര സര്‍ക്കാരിന്റെ സാമ്പത്തിക നയങ്ങളെ വിമര്‍ശിച്ച് യശ്വന്ത് സിന്‍ഹ കഴിഞ്ഞ ദിവസം ഇന്ത്യന്‍ എക്‌സ്പ്രസില്‍ ലേഖനമെഴുതിയിരുന്നു.
