കൊല്ലം: ആശ്രാമം ഇഎസ്ഐ ആശുപത്രിയിലെ ഹൃദ്രോഗ വിഭാഗത്തില് നാലുകൊല്ലത്തിനിടെ മരണപ്പെട്ടത് 106 രോഗികള് മാത്രമാണെന്ന് ഹാര്ട്ട് സെന്ററിന്റെ ചുമതല വഹിക്കുന്ന ഡോ: പ്രതാപ്കുമാര് പത്രസമ്മേളനത്തില് ചൂണ്ടിക്കാട്ടി. ഇത് മറ്റ് ആശുപത്രികളിലെ മരണനിരക്കിനേക്കാള് കുറവാണ്. എന്നാല് തുടര്മരണങ്ങള് നടക്കുന്നു എന്ന രീതിയില് പ്രചരണമഴിച്ചുവിട്ട് ഈ സംരംഭത്തെ ഇല്ലാതാക്കാന് ശ്രമം നടക്കുന്നുണ്ടെന്ന് അദ്ദേഹം ആരോപിച്ചു.
ഈ നാല് വര്ഷം കൊണ്ട് ഇഎസ്ഐ കോര്പ്പറേഷന് 12 കോടി രൂപ ലാഭമുണ്ടാക്കാനായിട്ടുണ്ടെന്നും അദ്ദേഹം പറഞ്ഞു. ശസ്ത്രക്രിയയെ തുടര്ന്ന് രോഗി മരിച്ച സംഭവത്തില് അന്വേഷണം പ്രഖ്യാപിച്ചിരിക്കുകയാണ്. ഒരു സംഭവത്തിന്റെ പേരില് സംവിധാനം ആകെ പരാജയമാണെന്ന് വരുത്താനുള്ള ശ്രമം നല്ലതല്ലെന്ന് അദ്ദേഹം പറഞ്ഞു.
ഇഎസ്ഐ ആശുപത്രിയില് വരുന്ന രോഗികള്ക്ക് ഹൃദയശസ്ത്രക്രിയയ്ക്ക് മറ്റ് ആശുപത്രികളിലേക്ക് പോകേണ്ടിയിരുന്ന സാഹചര്യം മാറിയത് ഹാര്ട്ട് സെന്റര് തുടങ്ങിയതോടെയാണ്. അത്തരം സന്ദര്ഭങ്ങളില് കോര്പ്പറേഷന് നല്കിയിരുന്നതിനേക്കാള് 46 ശതമാനം നിരക്ക് കുറച്ചാണ് ഇവിടെ ചികിത്സ നടപ്പാക്കുന്നതെന്ന് അദ്ദേഹം അവകാശപ്പെട്ടു. പത്രസമ്മേളനത്തില് ഡോ: മനു, ഡോ: സ്റ്റാലിന് എന്നിവരും പങ്കെടുത്തു.
