രാമപുരം: പാറമട ലോബിയ്ക്കെതിരെയുള്ള ജനകീയ സമരത്തിലൂടെ ജനശ്രദ്ധയാകര്ഷിച്ച കുറിഞ്ഞി കോട്ടമലയില് വംശനാശ ഭീഷണി നേരിടുന്ന അപൂര്വ്വയിനം ജീവികളെ കണ്ടെത്തി. ദേശീയ വന്യജീവി ബോര്ഡ് മെമ്പര് ഡോ. പി.എസ്. ഈസയുടെ നേതൃത്വത്തിലുള്ള ഗവേഷകസംഘം നടത്തിയ ഉരഗ ഉഭയ ജീവി കണക്കെടുപ്പിലാണ് പശ്ചിമഘട്ടത്തില് മാത്രം കണ്ടുവരുന്ന പാതാള തവളകള് ഉള്പ്പെടെ വിവിധയിനം അപൂര്വ്വജീവികളെ കണ്ടെത്തിയത്. ഇന്ത്യ പണ്ട് ആഫ്രിക്കന് ഭൂഖണ്ഡത്തിന്റെ ഭാഗമായിരുന്നു എന്നതിന് ജീവിച്ചിരിക്കുന്ന തെളിവുകള് ലോക ഉഭയജീവി ഭൂപടത്തില് ഇന്ത്യയില് നിന്നുള്ള പ്രധാനിയാണിത്. ജനലോകത്തെ മഹാബലി എന്നറിപ്പെടുന്ന ഇവ മുഴുവന് സമയവും മണ്ണിനടിയിലാണ് ജീവിക്കുന്നത്. വര്ഷത്തിലൊരിക്കല് മാത്രം പുറത്തുവന്ന് പ്രജനത്തിനു ശേഷം മുട്ടവിരിയിച്ച് വീണ്ടും മണ്ണിനടിയിലേയ്ക്ക് തന്നെപോകും. ഇവയുടെ വാല്മാക്രികള്ക്ക് കുത്തിയൊലിക്കുന്ന വെള്ളച്ചാട്ടങ്ങളില് പോലും പറ്റിപ്പിടിച്ചിരിക്കാനുള്ള കഴിവുണ്ട്. കോട്ടമലയിലെ മുക്തിയാര്കാവ് പ്രദേശത്താണ് പാതാള തവളകളെ കണ്ടെത്തിയത്.
വംശനാശ ഭീഷണി നേരിടുന്ന വയനാടന് മരപ്പല്ലി, ചെറുകാലന് പാറതവള, നാട്ടുമരപ്പല്ലി, ആനമല ബലൂണ് തവള, പച്ച ഇലതവള എന്നിവയേയും സര്വ്വേ ടീം കോട്ടമലയുടെ വിവിധ ഭാഗങ്ങളില് നിന്നും കണ്ടെത്തി. ഡോ. പി.എസ്. ഈസയ്ക്കൊപ്പം സന്ദീപ് ദാസ്, രാജ്കുമാര്, ഗ്യാനകുമാര്, നിധിന് തുടങ്ങിയവരും സംഘത്തിലുണ്ടായിരുന്നു. മുന്പ് ജൈവ വൈവിധ്യ ബോര്ഡ് നടത്തിയ പഠനത്തിലും കോട്ടമലയില് ഇന്റര്നാഷണല് യൂണിയന് ഫോര് നേച്ചര് ചുവപ്പ് പട്ടികയില് ഉള്പ്പെടുത്തിയിട്ടുള്ള 12ല് പരം ജീവജാലങ്ങളുണ്ടെന്ന് രേഖപ്പെടുത്തിയിട്ടുള്ളതാണ്.
