ന്യൂദല്ഹി: റോഹിങ്ക്യന് അഭയാര്ത്ഥികള് രാജ്യസുരക്ഷയ്ക്ക് വെല്ലുവിളിയാണെന്ന് കേന്ദ്രസര്ക്കാര് സുപ്രീംകോടതിയെ അറിയിച്ചു. പാക്കിസ്ഥാനിലെയും അഫ്ഗാനിസ്ഥാനിലെയും ഭീകരസംഘടനകളുമായി അഭയാര്ത്ഥികളില് പലര്ക്കും സജീവ ബന്ധമുണ്ടെന്നും സത്യവാങ്മൂലത്തില് വ്യക്തമാക്കി.
രാജ്യസുരക്ഷ മുന്നിര്ത്തിയാണ് റോഹിങ്ക്യന് അഭയാര്ത്ഥികളെ മ്യാന്മറിലേക്ക് തിരിച്ചയയ്ക്കണമെന്ന തീരുമാനം സ്വീകരിച്ചതെന്ന് കോടതിയെ കേന്ദ്രസര്ക്കാര് ധരിപ്പിച്ചു. ഇക്കാര്യത്തില് കോടതിയുടെ ഇടപെടല് ഉണ്ടാവരുതെന്നും രാഷ്ട്രീയ അഭയം ആവശ്യപ്പെട്ട് അഭയാര്ത്ഥികള് നല്കിയ ഹര്ജികളിന്മേല് നിലപാടറിയിച്ചുകൊണ്ട് കേന്ദ്രം വിശദീകരിച്ചു.
ഐഎസ് അടക്കമുള്ള ഭീകരസംഘടനകള് രാജ്യവിരുദ്ധ പ്രവര്ത്തനങ്ങള്ക്ക് അഭയാര്ത്ഥികളെ ഉപയോഗിക്കുമെന്ന് രഹസ്യാന്വേഷണ വിഭാഗത്തിന്റെ റിപ്പോര്ട്ടുണ്ട്. പാക്-അഫ്ഗാന് ഭീകരസംഘടനകളും ഇവരുമായി ബന്ധപ്പെടുന്നു. റോഹിങ്ക്യകളെ തിരിച്ചയയ്ക്കണമെന്ന തീരുമാനം വസ്തുതകളുടെ അടിസ്ഥാനത്തിലുള്ള നയപരമായ തീരുമാനമാണ്, ആഭ്യന്തര മന്ത്രാലയം സമര്പ്പിച്ച സത്യവാങ്മൂലത്തില് വ്യക്തമാക്കി. ചില ഭേദഗതികള്ക്കായി സത്യവാങ്മൂലം കേന്ദ്രം കോടതിയില് നിന്നും തിരിച്ചുവിളിച്ചു.
മ്യാന്മറില് നിന്നുള്ള അഭയാര്ത്ഥികളെ തിരികെ അയയ്ക്കാനുള്ള കേന്ദ്രസര്ക്കാര് തീരുമാനം അന്താരാഷ്ട്ര മനുഷ്യാവകാശ ഉടമ്പടികളുടെ ലംഘനമാണെന്നാരോപിച്ചാണ് സുപ്രീംകോടതിയില് ഹര്ജികള് സമര്പ്പിച്ചത്.
