തലശ്ശേരി: വന് ജനപങ്കാളിത്തത്തോടെ നടന്ന ശ്രീകൃഷ്ണ ജയന്തി ശോഭായാത്രയ്ക്ക് തലശ്ശേരി നഗരസഭയും ഭരണാധികാരികളുടെയും അവഗണന. ശോഭായാത്ര സംഗമസ്ഥലമായ സംഗമം ജംഗ്ഷനിലെ ഹൈമാസ് ലൈറ്റും സമീപ തെരുവുവിളക്കുകളും കത്തിക്കാതെ ഓഫ് ചെയ്താണ് മനോഹരമായ ഒരു പരിപാടിയെ അധികൃതര് ഇരുട്ടിലാഴ്ത്തിയത്. മുഖ്യമന്ത്രിയും ഒട്ടേറെ മന്ത്രിമാരും അധികാരസ്ഥാനീയരും സ്ഥിരമായി ഉപയോഗിക്കുന്ന തലശ്ശേരി റെയില്വെ സ്റ്റേഷനു സമീപമാണ് സംഗമം ജംഗ്ഷന് എന്നിരിക്കെ ഒരു പ്രധാന ചടങ്ങ് നടക്കുന്ന സ്ഥലത്തെ തെരുവ് വിളക്കുകള് കത്തിക്കുന്നതില് അധികൃതര് വിമുഖത കാട്ടുകയായിരുന്നു. ഒട്ടേറെ ക്രമസമാധാന പ്രശ്നങ്ങള് നിലനില്ക്കുന്ന സമയമായിട്ടു കൂടി ഭരണകൂടമോ പോലീസ് അധികൃതരോ ഇക്കാര്യം വേണ്ടത്ര ശ്രദ്ധിച്ചില്ലെന്ന് വ്യാപകമായ ആരോപണമുണ്ട്.
ജനങ്ങളുടെ നികുതിപ്പണം കൊണ്ട് നിര്മ്മിച്ച സംഗമം ജംഗ്ഷനിലെ ഹൈമാസ് ലൈറ്റ് ഏറ്റവും അത്യാവശ്യമായ സമയത്ത് കത്തിക്കാതിരുന്നത് അപലപനീയമാണെന്ന് നാട്ടുകാര് ചൂണ്ടിക്കാട്ടുന്നു.
