കണ്ണൂര്: ക്ലാര്ക്ക് തസ്തികയിലേക്ക് പരീക്ഷ നടത്തി രണ്ട് വര്ഷമായിട്ടും നിയമനം നടത്താത്ത ജില്ലാ സഹകരണ ബാങ്ക് അധികൃതരുടെ നടപടി വിവാദമാകുന്നു. ജില്ലാ സഹകരണ ബാങ്കിന്റെ വിവിധ ശാഖകളില് ക്ലാര്ക്ക് തസ്തികയിലേക്ക് ഒഴിവുകള് റിപ്പോര്ട്ട് ചെയ്തതിന്റെ അടിസ്ഥാനത്തിലാണ് പരീക്ഷ നടത്തി റാങ്ക് ലിസ്റ്റ് പ്രസിദ്ധപ്പെടുത്തിയത്. നിലവിലുള്ള റാങ്ക് ലിസ്റ്റില് നിന്ന് ഏതാനും പേര്ക്ക് മാത്രം നിയമനം നല്കിയിരുന്നു. എന്നാല് നിരവധി തസ്തികകള് ഒഴിഞ്ഞ് കിടക്കുമ്പോഴും ജീവനക്കാര് അധികമാണെന്ന വിശദീകണം നല്കി തല്ക്കാലം ആരെയും പോസ്റ്റ് ചെയ്യുന്നില്ലെന്നാണ് അധികൃതരുടെ നിലാട്. കേരള ഗ്രാമീണ് ബാങ്ക് നിലവില് വരാന് പോകുന്നതിനാല് തല്ക്കാലം നിയമനം നടത്തുന്നില്ലെന്നാണ് അധികൃതരുടെ വിശദീകരണം. പുതിയ സംവിധാനം വരുമ്പോള് കൂടുതല് പ്രൊഫഷണലായ ആളുകളാണ് വേണ്ടതെന്നും പറയുന്നു. എന്നാല് ജില്ലാ സഹകരണ ബാങ്കില് താല്ക്കാലികമായി നിയമനമില്ലെന്ന് പറയുമ്പോഴും പ്യൂണ്, അറ്റന്റര് തസ്തികയിലേക്ക് പുതിയതായി അപേക്ഷ ക്ഷണിക്കുകയും ചെയ്തിട്ടുണ്ട്.
നിലവില് പ്രാഥമിക സഹകരണ സംഘങ്ങളില് ജോലി ചെയ്യുന്നവരാണ് പരീക്ഷയഴുതി നിയമനം കാത്തിരിക്കുന്നവരില് പലരും. തുച്ഛമായ വേതനത്തിന് ജോലി ചെയ്യുന്ന പലര്ക്കും പ്രായപരിധി കഴിഞ്ഞതിനാല് മറ്റ് തസ്തികകളിലേക്ക് പിഎസ്സി പരീക്ഷ എഴുതാന് പോലും പലര്ക്കും സാധിക്കില്ല. ജില്ലാ സഹകരണബാങ്കുകളിലേക്കുള്ള നിയമനം മാത്രം പ്രതീക്ഷിച്ച് പ്രാഥമിക സഹകരണ സംഘങ്ങളില് ജോലി ചെയ്യുന്നവരുടെ ഭാവിതന്നെ അവതാളത്തിലാക്കുന്ന തീരുമാനമാണ് ഇപ്പോള് അധികൃതരുടെ ഭാഗത്തുനിന്നുണ്ടായിട്ടുള്ളത്. നിലവില് സംസ്ഥാനത്തെ പതിനാല് ജില്ലാ സഹകരണ ബാങ്കുകളിലും ഭരണസമിതികള് നിലവിലില്ല. സംസ്ഥാനസര്ക്കാരിന്റെ നേരിട്ടുള്ള നിയന്ത്രണത്തില് അഡ്മിനിസ്ട്രേറ്റീവ് ഭരണമാണ് നിലവിലുള്ളത്. അതുകൊണ്ട് തന്നെ സംസ്ഥാന സര്ക്കാര് മുന്കയ്യെടുത്താല് മാത്രമേ നിയമനം നടത്താന് സാധിക്കുകയുള്ളു. സംസ്ഥാനത്ത് നിയമന നിരോധനമില്ലെന്ന് സര്ക്കാര് ആവര്ത്തിച്ച് വ്യക്തമാക്കുമ്പോഴും അഭ്യസ്തവിദ്യരായവരുടെ ഭാവി തന്നെ ഇരുളിലാക്കുന്ന നയമാണ് അധികൃതരുടെ ഭാഗത്തുനിന്നുണ്ടാവുന്നതെന്നാണ് വ്യക്തമാകുന്നത്.
