ശ്രീനഗര്: ജമ്മു കശ്മീര് പോലീസിനായി ബുള്ളറ്റ്പ്രൂഫ് വാഹനങ്ങള് വാങ്ങുന്നതിന് തുക അനുവദിക്കുമെന്ന് കേന്ദ്ര ആഭ്യന്തരമന്ത്രി രാജ്നാഥ് സിങ് പറഞ്ഞു.
നാലുദിവസത്തെ സന്ദര്ശനത്തിനായി ഇന്നലെ കശ്മീരില് എത്തിയ രാജ്നാഥ് സിങ് അനന്ത്നാഗ് ജില്ലയില് പോലീസ് ഉദ്യോഗസ്ഥരുമായി നടത്തിയ കൂടിക്കാഴ്ചയിലാണ് ഇക്കാര്യം വ്യക്തമാക്കിയത്.
ജൂണ് 16നുണ്ടായ ഭീകരാക്രമണത്തില് ആറു പോലീസ് ഉദ്യോഗസ്ഥര് കൊല്ലപ്പെട്ടിരുന്നു. ഈ സാഹചര്യത്തിലാണ് ബുള്ളറ്റ് പ്രൂഫ് വാഹനങ്ങള് പോലീസ് ആവശ്യപ്പെട്ടത്. വെല്ലുവിളികളെ നേരിട്ടുകൊണ്ടുള്ള പോലീസിന്റെ പ്രവര്ത്തനത്തെ രാജ്നാഥ് പ്രശംസിച്ചു. ഇവര്ക്കായുള്ള ട്രോമ സെന്ററിനുള്ള തുകയും അനുവദിച്ചതായി അദ്ദേഹം പറഞ്ഞു.
ജമ്മു കശ്മീരിലെ പോലീസിന്റെ ധൈര്യത്തെ പ്രധാനമന്ത്രി അഭിനന്ദിച്ചതായും ആഭ്യന്തരമന്ത്രി പറഞ്ഞു. മറ്റൊരു ആഭ്യന്തര മന്ത്രിയും ഇതുപോലെ കശ്മീര് സന്ദര്ശിച്ചിട്ടില്ല. ഒരു വര്ഷത്തിനുള്ളില് അഞ്ചാമത്തെ സന്ദര്ശനമാണിതെന്നും രാജ്നാഥ് പറഞ്ഞു. കശ്മീരിലെ പ്രശ്നങ്ങള് പരിഹരിക്കുന്നതിനായി ആരുമായും തുറന്ന ചര്ച്ചയ്ക്ക് തയ്യാറാണെന്നും അദ്ദേഹം പറഞ്ഞു. സിആര്പിഎഫുമായും രാജ്നാഥ് കൂടിക്കാഴ്ച നടത്തുകയും സുരക്ഷാസംവിധാനങ്ങള് വിലയിരുത്തുകയും ചെയ്തു.
ഇതിനിടയില് ഷോപിയാനില് സുരക്ഷാസേനയുമായുണ്ടായ ഏറ്റുമുട്ടലില് രണ്ട് ഭീകരരെ വധിക്കുകയും ഒരാളെ അറസ്റ്റ് ചെയ്യുകയും ചെയ്തു. കൊല്ലപ്പെട്ടവരില് ഒരു ഭീകരനെ തിരിച്ചറിഞ്ഞിട്ടുണ്ട്.ഹിസ്ബുള് മുജാഹിദ്ദിന് ഭീകരന് താരിഖാണ് കൊല്ലപ്പെട്ടത്. മൂന്ന് മാസം മുമ്പ് ഭീകരസംഘടനയില് ചേര്ന്ന അദിലാണ് അറസ്റ്റിലായത്. ശനിയാഴ്ച മറ്റൊരു ഭീകരനെ ഏറ്റുമുട്ടലില് സുരക്ഷാസേന വധിച്ചിരുന്നു.
