കണ്ണൂര്: കേരള നിയമസഭയുടെ വജ്രജൂബിലി ആഘോഷങ്ങളുടെ ഭാഗമായി ജില്ലയില് വൈവിധ്യമാര്ന്ന പരിപാടികള് അരങ്ങേറും. 9, 10, 11 തീയതികളില് കല്യാശ്ശേരിയിലാണ് നിയമസഭാ സെക്രട്ടേറിയറ്റിന്റെയും ജില്ലാ ഭരണകൂടത്തിന്റെയും സംയുക്താഭിമുഖ്യത്തില് ആഘോഷപരിപാടികള് നടക്കുക.
നിയമസഭാ മ്യൂസിയം വിഭാഗം ഒരുക്കുന്ന നിയമസഭാ ചിത്രപ്രദര്ശനം മൂന്നു ദിവസങ്ങളിലായി കല്യാശ്ശേരി കെപിആര് സ്മാരക ഗവ.ഹയര് സെക്കന്ററി സ്കൂളില് നടക്കും. ഒന്പതിന് രാവിലെ 10 മണിക്ക് മന്ത്രി രാമചന്ദ്രന് കടന്നപ്പള്ളി പ്രദര്ശനം ഉദ്ഘാടനം ചെയ്യും. പി കരുണാകരന് എംപി ചടങ്ങില് അധ്യക്ഷത വഹിക്കും. ടി.വി.രാജേഷ് എംഎല്എ, ജില്ലാ പഞ്ചായത്ത് പ്രസിഡന്റ് കെ.വി.സുമേഷ് തുടങ്ങിയവര് ആശംസകള് നേരും.
രാവിലെ 110.30ന് കേരളം സാമൂഹ്യ വികസനത്തിന്റെ ചരിത്രം എന്ന വിഷയത്തില് ഡോ. പി.ജെ.വിന്സെന്റ് പ്രഭാഷണം നടത്തും. വൈകിട്ട് നാലു മണിക്ക് സ്കൂള് വിദ്യാര്ഥികളുടെ കലാപരിപാടികളും ആറു മണിക്ക് ജോണ് ഫെര്ണാണ്ടസ് എംഎല്എ എഴുതി സംവിധാനം ചെയ്ത മത്തായിയുടെ മരണം എന്ന നാടകവും അരങ്ങേറും.
10 ന് വൈകീട്ട് 3 മണിക്ക് കല്ല്യാശ്ശേരി ഹയര്സെക്കന്ററി സ്കൂളില് നടക്കുന്ന നിയമസഭാ വജ്രജൂബിലി ആഘോഷങ്ങളുടെ ഉദ്ഘാടനവും ഇ.കെ.നായനാര് സ്മൃതി സമ്മേളനവും മുഖ്യമന്ത്രി പിണറായി വിജയന് ഉദ്ഘാടനം ചെയ്യും. ഡപ്യൂട്ടി സ്പീക്കര് വി.ശശി അധ്യക്ഷത വഹിക്കും. പരിപാടിയില് നായനാരുടെ പത്നി ശാരദടീച്ചറും കുടുംബവും പങ്കെടുക്കും. തുടര്ന്ന് ജില്ലയിലെ മുന്നിയമസഭ സാമാജികരെ ആദരിക്കുന്ന ചടങ്ങില് മന്ത്രിമാരും എം.പിമാരും എം.എല്.എമാരും പങ്കെടുക്കും. വൈകീട്ട് 6 മണിക്ക് പൊന്തിമുഴക്കം നാടന്പാട്ടും ദൃശ്യാവിഷ്കാരവും അരങ്ങേറും.
11 ന് രാവിലെ 10 മണിക്ക് റബ്കോ ഓഡിറ്റോറിയത്തില് കേരളത്തിന്റെ പൊതുമണ്ഡലത്തില് സഹകരണ പ്രസ്ഥാനത്തിനുള്ള സ്വാധീനം എന്ന വിഷയത്തില് സെമിനാര് നടക്കും. മന്ത്രി കെ.കെ.ശൈലജ ടീച്ചര് ഉദ്ഘാടനം ചെയ്യുന്ന സെമിനാറില് എസ്. ശര്മ്മ എംഎല്എ വിഷയം അവതരിപ്പിക്കും. ഉച്ചയ്ക്ക് 1.30 ന് കല്ല്യാശ്ശേരി സ്കൂളില് സ്കൂള് കോളേജ് വിദ്യാര്ത്ഥികള് അവതരിപ്പിക്കുന്ന മാതൃകാനിയമസഭ സ്പീക്കര് പി.ശ്രീരാമകൃഷ്ണന് ഉദ്ഘാടനം ചെയ്യും. ജനാധിപത്യകേരളത്തിന്റെ അനുഭവങ്ങളും സാധ്യതകളും എന്ന വിഷയത്തില് സ്പീക്കര് സംസാരിക്കും. വൈകീട്ട് വിദ്യാര്ത്ഥികള് അവതരിപ്പിക്കുന്ന നാടകവും മറ്റ് കലാപരിപാടികളും അരങ്ങേറും.
