ഇരിട്ടി: ഓണപ്പൂക്കളമൊരുക്കാന് മല്ലികപ്പൂപ്പാടം തീര്ത്ത് വിളക്കോട് ഗ്ലോബല് ഇന്ത്യ പബ്ലിക് സ്കൂള് വിദ്യാര്ത്ഥികള് സ്കൂള് മുറ്റത്തോട് ചേര്ന്ന് അരയേക്കറോളം സ്ഥലത്ത് തീര്ത്ത പൂപ്പാടം പ്രദേശത്തെ വീടുകളില് പൂക്കളം തീര്ക്കാനായി നല്കും. കഴിഞ്ഞ ദിവസം ഒരു ക്വിന്റലോളം പൂക്കള് ഇവിടെ നിന്നും വില്പ്പന നടത്തിക്കഴിഞ്ഞു. കഴിഞ്ഞ വര്ഷവും ഇവിടുത്തെ വിദ്യാര്ത്ഥികള് പൂപ്പാടം തീര്ത്തിരുന്നു. ഇതില് നിന്നും പ്രചോദനമുള്ക്കൊണ്ടാണ് ഇക്കുറിയും ഇവര് ഇതിനായി ഇറങ്ങിപ്പുറപ്പെട്ടത്. ഓണപ്പൂക്കളമൊരുക്കാന് അന്യസംസ്ഥാനങ്ങളെ ആശ്രയിക്കുന്ന കേരളീയര്ക്ക് ഇതിലൂടെ നല്കുന്ന സന്ദേശം ഏറെ വലുതാണ്.
കര്ണാടകത്തിലെയും തമിഴ്നാട്ടിലെയും പോലെ പൂകൃഷി ഇവിടെയും സാധ്യമാണെന്ന സന്ദേശം തന്നെയാണത്. ഗുണ്ടല്പേട്ടില് നിന്നും കൊണ്ടുവന്ന ഹൈബ്രീഡ് വിത്തുകളാണ് കൃഷിക്കായി ഉപയോഗിച്ചത്. മുഴക്കുന്ന് കൃഷിഭവന്റെ സഹകരണവും വിദ്യാര്ത്ഥികള്ക്കും അദ്ധ്യാപകര്ക്കും ലഭിച്ചു. ജൈവവള മിശ്രിതം മാത്രമാണ് കൃഷിക്കായി ഉപയോഗിച്ചത്. തൊണ്ണൂറ് ദിവസം കൊണ്ട് തന്നെ ചെടികള് പൂത്തുലയാന് തുടങ്ങി. സ്വന്തം പൂക്കളമൊരുക്കാന് വിഷരഹിത നാടന് പൂക്കള് എന്ന ലക്ഷ്യത്തോടെയാണ് സ്കൂള് അധികൃതര് വേറിട്ടൊരു കൃഷിരീതി പരീക്ഷിച്ചത്. മുഴക്കുന്ന് കൃഷിഭവന്റെ സഹകരണവും മാനേജ്മെന്റ് സഹായവും എല്ലാം ഒത്തുവന്നപ്പോള് വിദ്യാര്ഥികളുടെ ലക്ഷ്യം പൂര്ത്തിയായി.
100 രൂപയാണ് ഇപ്പോള് ഒരു കിലോ പൂവിന്റെ വില. ഉത്രാടം നാളില് അത് 200 രൂപവരെ ഉയരാറുണ്ട്. മലയോരത്തിലെ ഈ വസന്തത്തെ ദര്ശിക്കാന് നിരവധി ആളുകളാണ് പൂന്തോട്ടത്തിലെത്തിച്ചേരുന്നത്. പൂന്തോട്ടങ്ങള് കാണാന് വേണ്ടി മാത്രം കര്ണ്ണാടകയിലെ ഗുണ്ടല്പേട്ടയിലേക്ക് പോയിരുന്ന മലയാളിക്ക് ഇനി സ്വന്തം നാട്ടിലെ പൂന്തോട്ടം കണ്ട് പൂക്കളും വാങ്ങി വീട്ടിലേക്ക് പോകാം.
