കൊട്ടാരക്കര: എംസി റോഡുവഴിയുള്ള യാത്രാദുരിതത്തിന് അന്ത്യം കുറിച്ച് ഏനാത്ത് പാലം മന്ത്രി ജി.സുധാകരന് ഗതാഗതത്തിന് തുറന്നു കൊടുത്തു. ഇന്നലെ വൈകിട്ട് 5 മണിയോടെയാണ് ഉദ്ഘാടനം നടന്നത്.
കാര്യക്ഷമതയുള്ള സര്ക്കാരും മന്ത്രിയുമാണ് കേന്ദ്രത്തിലേതെന്നും അവര്ക്ക് വീണ്ടും അഭിനന്ദനങ്ങള് രേഖപ്പെടുത്തുകയാണന്നും മന്ത്രി ജി. സുധാകരന് ഉദ്ഘാടന പ്രസംഗത്തില് പറഞ്ഞു. നാടിന്റെ വികസനകാര്യത്തില് രാഷ്ട്രീയം പാടിെല്ലന്നതിന്റെ ഉദാഹരണമാണ് സംസ്ഥാനസര്ക്കാരിന്റെ ഫാക്സ് കിട്ടിയ ഉടന്തന്നെ പട്ടാളത്തിനെ വിളിച്ച് ബെയ്ലി പാലം നിര്മ്മിക്കാന് നിര്ദ്ദേശം നല്കിയത്. ഈ കാര്യക്ഷമതയാണ് സര്ക്കാരുകള്ക്ക് വേണ്ടത്.
സംസ്ഥാനവും കേന്ദ്രവും ഭരിക്കുന്നത് ആരെന്നതല്ല പ്രശ്നം. ജനകീയ വിഷയത്തിലുള്ള ഇടപെടീലുകളാണ്. കരിങ്കല്ലും കോണ്ക്രീറ്റും ഉപയോഗിച്ച് കവിതകള് രചിച്ച കോണ്ട്രാക്ടര്മാര് പണ്ടുണ്ടായിരുന്നു. ഏകദേശം 40 വര്ഷമായി അതില്ലാതായി. ജനങ്ങളുടെ ജീവനും സ്വത്തിനും വിലകല്പ്പിക്കാതെ പദ്ധതികളിലെ പണം കൈയിട്ട് വാരി അഴിമതി കാണിച്ചപ്പോഴാണ് ഏനാത്തെ അവസ്ഥയുണ്ടായത്.
ബെയ്ലി പാലം പൊളിക്കുന്നത് സംബന്ധിച്ച അറിയിപ്പ് മിലിട്ടറി ഉദ്യോഗസ്ഥരില് നിന്ന് കിട്ടിയിട്ടുണ്ടെന്നും വ്യവസ്ഥാപിതമായി അത് ഉടന്തന്നെ പൊളിച്ചു കൊണ്ട് പോകുമെന്നും മന്ത്രി പറഞ്ഞു. അയിഷാപോറ്റി എംഎല്എ അധ്യക്ഷയായിരുന്നു. എംഎല്എ മാരായ ചിറ്റയംഗോപകുമാര്, കെ.ബി.ഗണേഷ്കുമാര്, എംപി കെ. സോമപ്രസാദ്, ബിജെപി കൊല്ലം, പത്തനംതിട്ട ജില്ലാപ്രസിഡന്റുമാരായ ജി.ഗോപിനാഥ്, അശോകന് കുളനട, ഡോ: അരവിന്ദന്, കെഎസ്ടിപി ചീഫ് എഞ്ചിനീയര് ഡാര്ലിന് ഡി. ഡിക്രൂസ്, കൊല്ലം, പത്തനംതിട്ട ജില്ല ജനപ്രതിനിധികള്, ഉദ്യോഗസ്ഥര് എന്നിവര് പങ്കെടുത്തു.
