കണ്ണൂര്: കുടുംബശ്രീ കണ്ണൂര് ജില്ലാ മിഷന്റെ മഹിളാ കിസാന് സശാക്തീകരണ പര്യോജനയുടെ ഭാഗമായി ആഗസ്ത് മാസം ജില്ലയിലെ 11 ബ്ലോക്കുകളിലായി മുപ്പത്തിമൂന്ന് സിഡിഎസ്സുകളില് നടത്തി വന്ന സുഫലം 2017 ഓണം പച്ചക്കറി ചന്ത 113 കടന്നു. 113ാമത്തെ ചന്ത ജില്ലാതലത്തില് കലക്ട്രേറ്റ് പരിസരത്ത് ജില്ലാ പഞ്ചായത്ത് പ്രസിഡന്റ് കെ.വി.സുമേഷ് ഉദ്ഘാടനം ചെയ്തു. കൊട്ടിയൂര്, മാലൂര്, കുറുമാത്തൂര്, തളിപ്പറമ്പ, മുണ്ടേരി, ചെറുകുന്ന് തുടങ്ങിയ ജില്ലയുടെ വിവിധ സിഡിഎസ്സുകളുടെ കീഴില് പ്രവര്ത്തിക്കുന്ന വനിതകളുടെ കൂട്ടായ്മയായ സംഘകൃഷി ഗ്രൂപ്പുകള് ഉത്പാദിപ്പിച്ച വിഷരഹിത നാടന് പച്ചക്കറികളാണ് ചന്തയില് വില്പ്പനക്കായി എത്തിച്ചിട്ടുള്ളത്. പൊതുവിപണിയില് ലഭ്യമല്ലാത്ത തവരയില, പൊന്നാങ്കണ്ണി ഇല തുടങ്ങിയവയും ചന്തയില് ലഭിക്കും.സുഫലം പച്ചക്കറി വിപണനമേള വഴി ഇതിനകം 26,500 കിലോ പച്ചക്കറി വില്പ്പന നടത്തുന്നതിന് കുടുംബശ്രീ മിഷന് സാധിച്ചതായി ജില്ലാ കോ-ഓര്ഡിനേറ്റര് ഡോ. എം സുര്ജിത്ത് അറിയിച്ചു. കൃഷി വകുപ്പിനേക്കാളും കുറഞ്ഞ വിലയിലാണ് സുഫലം പദ്ധതി വഴി പച്ചക്കറികള് വില്പ്പന നടത്തുന്നത്. മിതമായ നിരക്കില് വിഷരഹിതമായ പച്ചക്കറി ഉപഭോക്താക്കള്ക്ക് ലഭ്യമാക്കുക എന്നതിനോടൊപ്പം ജില്ലയിലെ വനിതാകര്ഷകര്ക്ക് അവരുടെ ഉല്പ്പന്നങ്ങള്ക്ക് ന്യായമായ വില നേടിക്കൊടുക്കുക എന്നതു കൂടിയാണ് സുഫലം പച്ചക്കറി ചന്തകളിലൂടെ ലക്ഷ്യമിടുന്നതെന്നും അദ്ദേഹം പറഞ്ഞു.
