ആലത്തൂര്‍:പുതിയ ബസ് സ്റ്റാന്റിനു സമീപത്തെ ന്യൂ സജ്‌ന മൊബൈല്‍സില്‍ ജൂണ്‍ മൂന്നിന് പുലര്‍ച്ചെ നടന്നമോഷണവുമായി ബന്ധപ്പെട്ട് ഒരാളെ കൂടി പോലീസ് പിടികൂടി. നെന്മാറ കയറാടി ഒലിപ്പാറ പാറപ്ലാക്കല്‍ വീട്ടില്‍ സിജോണ്‍ ജോയിയെ (37)യാണ് ആലത്തൂര്‍ പോലീസ് അറസ്റ്റ് ചെയ്തത്.
കേസില്‍ നേരത്തേ മംഗലംഡാം വീട്ടിക്കല്‍ കടവ് കാവുപുരയ്‌ക്കല്‍ വീട്ടില്‍ ജിബി തോമസ് (30)നെയും അന്‍ഷാദിനെയും പിന്നീട് അറസ്റ്റ് ചെയ്തിരുന്നു.സംഘാംഗമായ അയിലൂര്‍ ഒലിപ്പാറ പോത്തുണ്ടി സ്വദേശി പ്രണവ് ഒളിവിലാണ്. മേലാര്‍കോട് കല്ലമ്പാട് ബീവറേജസ് ഷോറൂമിനു സമീപത്തുനിന്നാണ് സിജോണ്‍ ജോയിയെ പോലീസ് പിടികൂടിയത്.
കൂട്ടുപ്രതികളായ പ്രണവ് രണ്ടു കൊലപാതകകേസുകളിലും വിവിധ കഞ്ചാവ് കേസുകളിലും പ്രതിയാണ്.ഒന്നാം പ്രതി ജിബിതോമസിന്റെ റബ്ബര്‍ തോട്ടത്തിലെ ടാപ്പിംഗ് തൊഴിലാളിയാണ് സിജോണ്‍ ജോയ്. ജിബി തോമസിന്റെ ആഢംബര കാറിലാണ് മോഷണത്തിനായി പ്രതികള്‍ എത്തിയത്. സിജോണ്‍ ജോയിയും, പ്രണവും, കടയില്‍ എത്തി ഷട്ടര്‍ തകര്‍ത്ത് അകത്തുകയറിയതിനുശേഷമാണ് ജിബി തോമസ് കടയിലെത്തിയത്. രണ്ടു ചാക്കുകളിലായി മൊബൈലും അനുബന്ധ സാധനങ്ങളും കയറ്റുന്ന ദൃശ്യം ലിങ്ക് റോഡ് പള്ളിക്കു സമീപമുള്ള സ്വകാര്യ ജെന്‍സ് വെയര്‍ഷോപ്പിലെ സിസിടിവിയില്‍ നിന്നും പോലീസ് കണ്ടെടുത്തിരുന്നു. എസ്‌ഐ എസ്.അനീഷ്, സിപിഒമാരായ സൂരജ് ബാബു, റഷീദ്, കൃഷ്ണദാസ് എന്നിവരുടെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്. ഇയാളെ ഇന്ന് കോടതിയില്‍ ഹാജരാക്കും.
പ്രതികരിക്കാൻ ഇവിടെ എഴുതുക: