കോട്ടയം: കുമരകം വില്ലേജിലെ പന്ത്രണ്ടാം ബ്ലോക്ക് നാലുപന്തിയില് നടന് ദിലീപ് കയ്യേറിയെന്ന് ആരോപണമുയര്ന്ന ഭൂമി ജില്ലാ കളക്ടര് സി.എ. ലതയുടെ നേതൃത്വത്തിലുള്ള സംഘം പരിശോധിച്ചു.
ജില്ലാ സര്വെ സൂപ്രണ്ട് വിനോദ്, അഡീഷണല് തഹസീല്ദാര് ബാബുസേവ്യര്, കുമരകം വില്ലേജ് ഓഫീസര് തോമസ്കുട്ടി എന്നിവര് കളക്ടര്ക്ക് ഒപ്പമുണ്ടായിരുന്നു. ജില്ലാ കളക്ടര് ഇതു സംബന്ധിച്ച റിപ്പോര്ട്ട് സമര്പ്പിക്കാന് തഹസീല്ദാരെ ചുമതലപ്പെടുത്തി. തഹസീല്ദാര് റിപ്പോര്ട്ട് ഇന്ന് കളക്ടര്ക്ക് കൈമാറും. ഇതിനു ശേഷം റവന്യു വകുപ്പ് തുടര് നടപടികള് സ്വീകരിക്കും.
കുമരകം നസ്രത്ത് പള്ളിക്കുസമീപം ബ്ലോക്ക് നമ്പര് 12-ല് സര്വേ നമ്പര് 190/1, തണ്ടപ്പേര് നമ്പര് 7139 ആയി ഒരുഹെക്ടര് 33ആര് 89 സ്ക്വയര്മീറ്റര് ഭൂമിയാണ് സെന്റിന് 70,000 രൂപയ്ക്ക് 2005ല് ദിലീപ് വാങ്ങിയത്. ഭൂമിയോട് ചേര്ന്ന് കായല്ത്തീരം 45 മീറ്റര് നീളത്തില് കരിങ്കല്ഭിത്തി കെട്ടി സംരക്ഷിച്ചിട്ടുണ്ട്.
പുറമ്പോക്കായ മൂന്നുസെന്റും ചേര്ത്ത് സെന്റിന് മൂന്നുലക്ഷം രൂപയ്ക്ക് 2007-ല് ദുബായ് ആസ്ഥാനമാക്കി ബിസിനസ് നടത്തുന്ന മുംബൈ സ്വദേശിയുടെ ഉടമസ്ഥതയിലുള്ള കമ്പനിക്ക് മറിച്ചുവിറ്റതായാണ് ആരോപണം.
