തൃശൂര്: ജില്ലയിലെ ആര്ദ്രം പദ്ധതിയുടെ ആദ്യഘട്ട പ്രവര്ത്തനങ്ങള് തിരഞ്ഞെടുത്ത 9 ആരോഗ്യ സ്ഥാപനങ്ങളില് ചിങ്ങം ഒന്നിന് ആരംഭിക്കും. പൂമംഗലം, പൊയ്യ, പുത്തൂര്, പാറളം, മുണ്ടൂര്, വേലൂര്, ദേശമംഗലം, തെക്കുംകര, മണലൂര് എന്നിവിടങ്ങളിലാണ് പദ്ധതി ആരംഭിക്കുന്നത്. മൂന്ന് ഡോക്ടര്മാര്, 4 സ്റ്റാഫ് നേഴ്സുമാര്, ഒരു ലാബ് ടെക്നീഷ്യന് എന്നിവരാണ് 9 ഇടങ്ങളിലും സേവനമനുഷ്ഠിക്കുക. ആദ്യഘട്ട പ്രവര്ത്തനത്തിന്റെ ജില്ലാതല ഉദ്ഘാടനം മണലൂര് പി.എച്ച് സിയില് നടക്കും.
അഞ്ചിടത്ത് തൃശൂര് നിര്മ്മിതിയും നാലിടത്ത് തൃശൂര് കോസ്റ്റു ഫോര്ഡുമാണ് പുനരുദ്ധാരണ പ്രവര്ത്തനങ്ങള് നടത്തുക.ആഗസ്റ്റ് 15ന് നിര്മ്മാണം പൂര്ത്തിയാക്കും. ആരോഗ്യ സ്ഥാപനങ്ങളിലെ കുറവുകള് നികത്തുവാന് എന്.എച്ച് എമ്മില് നിന്നുള്ള ഫണ്ട് തദ്ദേശ സ്ഥാപനങ്ങളിലെ പ്രോജക്ട് ഫണ്ട്, എം.എല്.എ ഫണ്ട് എന്നിവ ഉപയോഗിക്കും. ആര്ദ്രം പദ്ധതിയുടെ പ്രവര്ത്തനങ്ങള് സംബന്ധിച്ചുള്ള അവലോകന യോഗം ആഴ്ചതോറും കളക്ടറുടെ സാന്നിദ്ധ്യത്തില് നടത്തും.
