പാലാ: കടപ്പാട്ടൂര് മഹാദേവക്ഷേത്രത്തിലെ 57-ാമത് വിഗ്രഹദര്ശന വാര്ഷിക ദിനമായിരുന്ന ഇന്നലെ പുലര്ച്ചെ 4 മുതല് വിശേഷാല് പൂജകള് ആരംഭിച്ചു. 6 മുതല് ധാരാനാമജപമുണ്ടായിരുന്നു. തന്ത്രി പറമ്പൂരില്ലത്ത് നാരായണന് ഭട്ടതിരിപ്പാട്, മേല്ശാന്തി ബിജു വിഷ്ണു നാരായണന് നമ്പൂതിരി എന്നിവരുടെ നേതൃത്വത്തിലാണ് വിശേഷാല് പൂജകള് നടന്നത്. വിഗ്രഹം ലഭിച്ച സമയമായ ഉച്ചയ്ക്ക് 2മണിക്ക് നടന്ന പ്രത്യേക ദീപാരാധനയ്ക്ക് ശേഷം വിഗ്രഹം കണ്ടെത്തുന്നതിന് കാരണഭൂതനായ മഠത്തില് പാച്ചുനായരെ ദേവസ്വം ഭാരവാഹികള് ദക്ഷിണ നല്കി ആദരിച്ചു.
പാലാ കെ.ആര്. മണി കടപ്പാട്ടൂരപ്പന് അവതാരചരിതം ഓട്ടന്തുള്ളല് തിരുവരങ്ങില് അവതരിപ്പിച്ചു. വൈകിട്ട് 7മണിക്ക് ദീപാരാധനയ്ക്ക് ശേഷം രാഹുല് ഈശ്വറിന്റെ പ്രഭാഷണവും തുടര്ന്ന് പ്രശസ്ത ആയുര്വേദ ഡോക്ടറും, സാമവേദ പണ്ഡിതനുമായ ഡോ.ശിവകരന് നമ്പൂതിരിയെ ക്ഷേത്രം ഭാരവാഹികള് ആദരിക്കുന്ന ചടങ്ങും നടന്നു.
ആഘോഷചടങ്ങുകള്ക്ക് ദേവസ്വം പ്രസിഡന്റ് സി.പി. ചന്ദ്രന്നായര്, സെക്രട്ടറി എസ്.ഡി.സുരേന്ദ്രന് നായര്, വി ഗോപിനാഥന് നായര്, തുടങ്ങിയവര് നേതൃത്വം നല്കി.
