തിരുവല്ല: തുകലശ്ശേരി ഐഒബി ശാഖയില്‍ ക്രിസ്മസ് രാത്രിയില്‍ നടന്ന 27 ലക്ഷത്തിന്റെ കവര്‍ച്ചയുമായി ബന്ധപ്പെട്ട് ആറുമാസം പിന്നിടുമ്പോഴും പോലീസ് ഇരുട്ടില്‍ തപ്പുന്നു.
കേസില്‍ പ്രതികളെ സംബന്ധിച്ച് പ്രാഥമിക നിഗമനത്തില്‍ എത്താന്‍ പോലും പോലീസിന് കഴിയുന്നില്ല.അന്ന് സിഐ ആയിരുന്ന വിദ്യാധരന്റെ നേതൃത്വത്തിലാണ് അന്വേഷണം ഇപ്പോഴും നടക്കുന്നത്.ഇപ്പോള്‍ അദ്ദേഹം ഡിവൈഎസ്പിയാണ്. നാല് സംഘങ്ങളായി തിരിഞ്ഞുളള അന്വേഷണമാണ് ഇപ്പോള്‍ നടക്കുന്നത്.ബാങ്കിലെ സി.സി കാമറകളും ഹാര്‍ഡ് ഡിസ്‌ക്കുകളും കൊള്ള സംഘം കവര്‍ന്നതിനാല്‍ തുടക്കത്തില്‍ തന്നെ പോലീസിന് വ്യക്തമായ ദിശാബോധം ലഭ്യമായിരുന്നില്ല.
ബാങ്കിന്റെ സമീപ പ്രദേശങ്ങളിലും സി.സി കാമറകള്‍ ഉണ്ടായിരുന്നില്ല.നിലവില്‍ ഒരുകിലോമീറ്റര്‍ ചുറ്റളവുള്ള പ്രദേശത്തെ സിസി.ടീവികളുടെ ദൃശ്യങ്ങള്‍ പോലീസ് ശേഖരിച്ച് കഴിഞ്ഞു.എങ്കിലും വ്യക്തമായ തെളിവുകള്‍ ഒന്നും ഇതില്‍ നിന്ന ലഭിച്ചിട്ടില്ല.
ക്രിസ്മസ് തലേന്ന് രാത്രി പ്രാര്‍ത്ഥനിയില്‍ പങ്കെടുക്കാന്‍ പളളിയിലേക്ക് പോയ ടോണി എന്ന യുവാവ് ബാങ്കിന്റെ പരിസരത്ത് മുഖംമൂടി ധരിച്ച രണ്ട് പേരെ കണ്ടിരുന്നതായും അവര്‍ ഹിന്ദി സംസാരിച്ചിരുന്നതായി മൊഴി നല്‍കിയിരുന്നു. ഇതിന്റെ അടിസ്ഥാനത്തില്‍ രേഖാചിത്രം അടക്കം തയ്യാറാക്കാനുള്ള ഒരുക്കത്തിലാണ് പോലീസ്.എന്നാല്‍ ഹിന്ദിയിലുളള സംസാരം അന്വേഷണം വഴിതിരിച്ച് വിടുന്നതിന്റെ ഭാഗമായി പ്രഫണല്‍ മോഷണസംഘം ഉപയോഗിച്ചതാകാമെന്നും പോലീസ് സംശയിക്കുന്നുണ്ട്.
കാസര്‍കോഡ് നടന്ന ബാങ്ക് കവര്‍ച്ചയുമായി ഈ കേസിന് ഉളള സമാനതയും പോലീസ് കാര്യമായി എടുത്തിട്ടുണ്ട്. എന്നാല്‍ കവര്‍ച്ച സംബന്ധിച്ച കാര്യമായ കൂടുതല്‍ തെളിവുകള്‍ ഒന്നും തന്നെ പോലീസിന് ഇതുവരെ ലഭിച്ചിട്ടില്ല.
പ്രദേശത്തെ വിവിധ അന്യസംസ്ഥാന തൊഴിലാളി ക്യാമ്പുകളിലായി നൂറോളം പേരെ ഇതുവരെ പോലീസ് ചോദ്യം ചെയ്തിട്ടുണ്ട്. എന്നാല്‍ മോഷണത്തില്‍ സാങ്കേതിക പരിജ്ഞാനം ലഭിച്ചിട്ടുള്ളവരുടെ സാന്നിദ്ധ്യം അടിവരയിടുന്നതും പോലീനെ കുഴക്കുന്നുണ്ട്.ബാങ്ക് ലോക്കറിന്റെ പൂട്ട് അറുത്തു മാറ്റിയ രീതി തികച്ചും പ്രഫഷണലാണെന്ന നിഗമനത്തിലാണ് പോലീസ്. കൂടാതെ പ്രഫഷണല്‍ കവര്‍ച്ചാ സംഘങ്ങളിലേക്ക് അന്വേഷണം വ്യാപിപ്പിക്കാന്‍ പോലീസിനെ പ്രേരിപ്പിക്കുന്നത്.
സമാനമായ കേസുകളില്‍ ഉള്‍പ്പെട്ടിട്ടുളള സംസ്ഥനത്തെ മോഷണ സംഘങ്ങളെയും ഇതര സംസ്ഥാനക്കാരെയും കേന്ദ്രീകരിച്ചാണ് നിലവില്‍ അന്വേഷണം പുരോഗമിക്കുന്നത്. ആറുമാസം പിന്നിട്ടും പോലീസിന് കാര്യമായ വിവിരങ്ങള്‍ ഒന്നും തന്നെ കിട്ടാത്ത സാഹചര്യത്തില്‍ പുതിയ സംഘത്തെ അന്വേഷണം ഏല്‍പ്പിക്കണമെന്നാണ് നാട്ടുകാരുടെ ആവശ്യം.
പ്രതികരിക്കാൻ ഇവിടെ എഴുതുക: