ചാലക്കുടി: നടിയെ ആക്രമിച്ച കേസില് അറസ്റ്റിലായ നടന് ദിലീപിനെതിരെ വ്യാപക പ്രതിഷേധം. ദിലീപിന്റെ ചാലക്കുടിയിലുള്ള ഡി സിനിമാസിന് മുന്പില് യുവജന സംഘടനകളുടെ നേതൃത്വത്തില് പ്രതിഷേധ മാര്ച്ചും ധര്ണ്ണയും സംഘടിപ്പിച്ചു.
യുവമോര്ച്ചയുടെ നേതൃത്വത്തില് സിനിമ തീയറ്ററിലേക്ക് പന്തം കൊളുത്തി പ്രകടനവും ധര്ണ്ണയും നടത്തി. തീയറ്ററിന് മുന്വശത്ത് വെച്ച് പോലീസ് പ്രകടനം തടയുകയായിരുന്നു. തുടര്ന്ന് നടന്ന ധര്ണ്ണ ബിജെപി മണ്ഡലം ജനറല് സെക്രട്ടറി അഡ്വ.സജി കുറുപ്പ് ഉദ്ഘാടനം ചെയ്തു.
യുവമോര്ച്ച മണ്ഡലം പ്രസിഡന്റ് സുനില് കാരാപ്പാടം അദ്ധ്യക്ഷത വഹിച്ചു. ബിജെപി ജില്ലാ ജനറല് സെക്രട്ടറി കെ.പി.ജോര്ജ്ജ്, മണ്ഡലം ജനറല് സെക്രട്ടറി കെ.യു.ദിനേശന്, യുമോര്ച്ച ജില്ലാ വൈസ് പ്രസിഡന്റ് ടി.വി.പ്രജിത്ത്, കിഷോര് കാബളത്ത്, വിസന്റ് വില്സന്, പി.എസ്.ബ്രൂഷോ, രജ്ജിത്, ജയസൂര്യ, ജ്യോതിഷ്, ജെയ്ജു തുടങ്ങിയവര് പ്രകടനത്തിന് നേതൃത്വം നല്കി.
ധര്ണ്ണക്കിടയില് തീയറ്ററിന് നേരെ കല്ലേറുണ്ടായെങ്കിലും മറ്റ് അനിഷ്ട സംഭവങ്ങള് ഒന്നുമുണ്ടായില്ല. പ്രതിഷേധത്തെ തുടര്ന്ന് സിനിമാപ്രദര്ശനം വൈകി. ചാലക്കുടി എസ്.ഐ ജയേഷ് ബാലന്റെ നേതൃത്വത്തിലുള്ള വന് പോലീസ് സംഘം സ്ഥലത്തുണ്ടായിരുന്നു. കനത്ത പോലീസ് കാവലിലാണ് ഇന്നലെ പ്രദര്ശനം നടന്നത്.
യൂത്ത് കോണ്ഗ്രസിന്റെ നേതൃത്വത്തില് നടത്തിയ മാര്ച്ച് സൗത്ത് ജംഗ്ഷനില് ഡി.സി.സി.പ്രസിഡന്റ് ടി.എന്.പ്രതാപന് ഉദ്ഘാടനം ചെയ്തു. യൂത്ത് കോണ്ഗ്രസ് പ്രവര്ത്തകര് ഡിസിനിമാസിലേക്ക് അതിക്രമിച്ച് കയറുവാന് ശ്രമിച്ചത് പോലീസുമായി ചെറിയ ബല പ്രയോഗത്തിന് കാരണമായി.
ദിലീപിന്റെ തന്നെ സ്ഥാപനമായ ഐ വിഷന് നേരെ പ്രതിഷേധമൊന്നു മുണ്ടായില്ല.
