പിരായിരി: പള്ളിക്കുളത്ത് നായകുറുകെ ചാടിയതിനെ തുടര്‍ന്ന് ബൈക്കില്‍ നിന്ന് വീണ് യുവാവിന് പരിക്ക്. പള്ളിക്കുളം ബസ്‌സ്റ്റോപ്പിനു സമീപം അനീസ് കോട്ടേജിനു മുന്‍വശത്താണ് അപകടം. കൊടുന്തിരപ്പുള്ളി ഭാഗത്തു നിന്നും വന്ന ഇരുചക്രവാഹനത്തിനു കുറുകെ നായ ചാടിയതോടെ നിയന്ത്രണം വിട്ട ബൈക്ക് കാറിലിടിക്കുകയായിരുന്നു.
ബൈക്കോടിച്ചിരുന്ന പല്ലഞ്ചാത്തനൂര്‍ തെക്കുംമുറി ബാലചന്ദ്രന് നിസാര പരിക്കേറ്റു. അപകടമേഖലയായ ഇവിടെ രാപകലന്യേ തെരുവുനായ ശല്യവും രൂക്ഷമാണ്. രാത്രികാലങ്ങളില്‍ പ്രദേശത്ത് തെരുവുവിളക്കുകള്‍ കത്താത്തതും തെരുവുനായ ശല്യവും മൂലം നിരവധി അപകടങ്ങള്‍ക്ക് കാരണമായിട്ടുണ്ട്.
അടുത്തകാലത്ത് റോഡുനവീകരിച്ചതോടെ വാഹനങ്ങളുടെ അമിതവേഗതയും പലപ്പോഴും അപകടങ്ങള്‍ക്ക് കാരണമാവുന്നുണ്ട്. മില്‍മ ബൂത്ത് മുതല്‍ പള്ളിക്കുളം ബസ് സ്റ്റോപ്പ് വരെയുള്ള ഭാഗത്താണ് അപകടം നടക്കുന്നതെന്നതിനാല്‍ പ്രദേശവാസികളും ആശങ്കയിലാണ്. ഇവിടെ അപകടം നിയന്ത്രിക്കാന്‍ സ്പീഡ് ബ്രേക്കുകള്‍ സ്ഥാപിക്കുന്നതും തെരുവുവിളക്കുകള്‍ പ്രവര്‍ത്തനയോഗ്യമാക്കണമന്ന ആവശ്യവും ശക്തമാവുകയാണ്.
പ്രതികരിക്കാൻ ഇവിടെ എഴുതുക: