കൊച്ചി: ആക്രമണത്തിനിരയായ നടിയുടെ നിശ്ചയദാര്ഢ്യം കേസില് വഴിത്തിരിവായി. കേസുമായി മുന്നിട്ടിറങ്ങി ആദ്യത്തെ ആവേശത്തിനു ശേഷം പിന്തിരിയുന്നിടത്ത് ഉറച്ച നിലപാട് സ്വീകരിച്ച നടിക്കൊപ്പം സിനിമാ മേഖലയിലെയും പൊതുസമൂഹത്തിലെയും ഒരു വിഭാഗം ഒപ്പംനിന്നപ്പോള് കാര്യങ്ങള്ക്കു വേഗമേറി.
ഫെബ്രുവരി പതിനേഴിന് രാത്രിയുണ്ടായ സംഭവത്തില് ഒരാഴ്ചയ്ക്കിടെ പള്സര് സുനിയടക്കം അറസ്റ്റിലായി. ഇതിനിടെ, കേസന്വേഷണം മന്ദഗതിയിലായി. അപ്പോഴൊക്കെയും തന്റെ തീരുമാനത്തില് നിന്ന് അണുവിട പിന്മാറാന് നടി തയാറായില്ല. അന്വേഷണം മുന്നോട്ടു കൊണ്ടുപോകാന് വേണ്ട ഇടപെടലും അവര് നടത്തി. തിരശീലയ്ക്കു പിന്നിലിരിക്കാതെ വീണ്ടും അഭിനയ രംഗത്തേക്ക് കടന്നു.
ഇതിനിടെ, നടിക്കു പിന്തുണയുമായി സിനിമയിലെ സ്ത്രീകള് സംഘടനയുമായി രംഗത്തെത്തി. ‘വിമെന് ഇന് സിനിമ കളക്ടീവ്’ എന്ന ഈ സംഘടന അന്വേഷണം ശക്തമാക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന് നിവേദനവും നല്കി. മഞ്ജു വാര്യരാണ് ഈ സംഘടനയ്ക്ക് ചുക്കാന് പിടിച്ചത്.
പിന്നീട് അന്വേഷണം മന്ദഗതിയിലെന്നു തോന്നുമ്പോഴോ, നടിക്കെതിരെ പരാമര്ശങ്ങളുണ്ടാകുമ്പോഴോ ശക്തമായ നിലപാടുകളുമായി ഇവര് രംഗത്തെത്തി. അഭിപ്രായങ്ങള് ഫേസ്ബുക്ക് പോസ്റ്റിലൂടെ ലോകമറിഞ്ഞു. അമ്മയുടെ സമ്മേളനത്തില് നടിക്കു പിന്തുണ ലഭിക്കാതിരുന്നപ്പോഴും ശക്തമായ ഇടപെടലുമായി അവരെത്തി.
