കൊച്ചി: നൂറ്റിനാല്പ്പത്തഞ്ചു ദിവസം മുമ്പായിരുന്നു ആ വിശ്വാസ വഞ്ചനയും നിഷ്ഠുര ആക്രമണവും. ഇരുട്ടിന്റെ മറവിലും പകല് വെളിച്ചത്തിലും നടക്കുന്ന പല സ്ത്രീപീഡനങ്ങളിലൊന്നായി ആരാലും അറിയപ്പെടാതെ പോയില്ല ഈ കേസ്. പീഡനത്തിനിരയായ നടി, തന്റെ പ്രശസ്തിയെ ബാധിക്കുമെന്നോ തൊഴലിനും ഭാവി ജീവിതത്തിനും ദോഷമാകുമെന്നോ ഭയക്കാതെ ഉറച്ച തീരുമാനമെടുത്തതാണ് വമ്പന് സ്രാവുകള് കുടുങ്ങാന് കാരണമായത്.
ഒരുപക്ഷേ ഈ കേസില് മാത്രമല്ല, ഇത്തരം നീചവൃത്തിക്കു മുതിരുന്നവര്ക്കെല്ലാമുള്ള താക്കീതും ഇരകളായേക്കാവുന്നവര്ക്കുള്ള മാതൃകയുമായി വഴിത്തിരിവായ ആ തീരുമാനം; അങ്ങനെ പോലീസില് പരാതിയെത്തി.
ജിഷ വധക്കേസിലെ ബംഗാള് സ്വദേശിയെപ്പോലെ, ഒരു പ്രതിയില് കേസൊതുങ്ങുമെന്ന് പലരും ഭയന്നു. മാധ്യമങ്ങളും സാമൂഹ്യ മാധ്യമങ്ങളും കുറേയെല്ലാം വിമശര്ന വിധേയമായെങ്കിലും ഈ കേസിന്റെ ഇങ്ങനെയൊരു പരിണാമത്തില് നിര്ണ്ണായകമായി. എന്നാല്, പള്സര് സുനിയുടെ ആലുവ സബ്ജയിലിലെ സഹതടവുകാരനും മൊബൈല് ഫോണുമാണ് മറ്റൊരു വഴിത്തിരിവുണ്ടാക്കിയത്. ജിംസണ് കേട്ട ഫോണ്വിളിയും ജയിലില് നിന്ന് മറ്റൊരു സഹതടവുകാരനായ വിഷ്ണു ദിലീപിന് അയച്ച കത്തും അയാളുടെ വെളിപ്പെടുത്തലും കേസന്വേഷണത്തില് നിര്ണ്ണായകമായി. പള്സര് സുനിയില് ഒതുങ്ങിയേക്കാമായിരുന്ന കേസ് പുനരുജ്ജീവിച്ച് ഇങ്ങനെ പരിണമിച്ചത് അതിലൂടെയാണ്.
ദിലീപിന്റെ ഗൂഢാലോചനയെക്കുറിച്ചുള്ള കൂടുതല് അന്വേഷണം മറ്റു പലരിലേക്കുമെത്തുമെന്നാണ് സൂചനകള്. ദിലീപിന്റെ ഉറ്റ സൃഹൃത്ത് നാദിര്ഷ, ഈ സംഭവത്തിനു ശേഷം നാദിര്ഷാ കൂടിക്കാഴ്ച നടത്തിയ എഡിജിപി ടോമിന് തച്ചങ്കരി, ദിലീപിന്റെ മാനേജര് അപ്പുണ്ണി, അപ്പുണ്ണിയെ ബിനാമിയാക്കി ഇടപാടുകള് നടത്തുന്ന ചില പ്രമുഖ നടന്മാര്… അങ്ങനെ പട്ടിക നീളുന്നു. പലര്ക്കും ഇനി ഉറക്കമില്ലാ രാത്രികള് തുടങ്ങുകയായി.
അമ്മ എന്ന സംഘടനയുടെ അസ്തിത്വം ചോദ്യം ചെയ്യപ്പെടും. അതേസമയം വിമന് ഇന് കളക്ടീവ് എന്ന പുതിയ വനിതാ സിനിമാ പ്രവര്ത്തകരുടെ സംഘടനയ്ക്ക് വിശ്വാസ്യതയും പിന്തുണയും പ്രസക്തിയും വര്ധിക്കുകയും ചെയ്യും. ചിലരുടെ പൊയ്മുഖങ്ങള് അഴിഞ്ഞു വീഴും അണിയറയിലെങ്കിലും ചില മുഖങ്ങള് തെളിഞ്ഞുദിക്കും.
സംഭവത്തില് ഗൂഢാലോചന ആദ്യമേ തള്ളിയ മുഖ്യമന്ത്രി, കേസ് തിരക്കഥയനുസരിച്ച് തിരിക്കാന് പള്സര് സുനിയെ ‘കൊല്ലാക്കൊല’ ചെയ്ത് പോലീസിലെ ചിലര്, ദിലീപിന്റെ സംരക്ഷണയ്ക്കെത്തിയ പ്രമുഖര് തുടങ്ങി പലരും പോലീസ് ആസ്ഥാനത്തുനിന്നിറങ്ങിയ ടി. പി. സെന്കുമാറിനെ ഭയന്നു. തുറന്നടിക്കാന് തയ്യാറായി സെന്കുമാര്, അന്വേഷണമേറ്റെടുക്കാന് സന്നദ്ധമായി സിബിഐ; സംരക്ഷിക്കാന് തുനിഞ്ഞിറങ്ങിയവര് വെച്ചൊഴിയുകയായിരുന്നു, ദിലീപിന്റെ അറസ്റ്റ് അങ്ങനെ സംഭവിക്കുകയായിരുന്നു.
