ഭുവനേശ്വര്: ഏഷ്യന് അത്ലറ്റിക്സ് ചാമ്പ്യന്ഷിപ്പില് ഇന്ത്യന് കുതിപ്പിന് കരുത്തേകിയ മലയാളി താരങ്ങള് കാത്തിരിക്കുകയാണ്, അധികൃതരുടെ പ്രോത്സാഹനത്തിനായി. മെഡല് നേടിയവരില് നിരവധി മലയാളികളുണ്ടെങ്കിലും സംസ്ഥാന സര്ക്കാര് ഇതുവരെ ക്യാഷ് അവാര്ഡ് പ്രഖ്യാപിക്കാന് തയ്യാറായിട്ടില്ല. പ്രഖ്യാപിച്ചിട്ടും കാര്യമൊന്നുമില്ല. സമ്മാനത്തുക ലഭിക്കാന് വര്ഷങ്ങള് കാത്തിരിക്കേണ്ടിവരുമെന്നതാണ് മുന്കാല ചരിത്രം.
ചാമ്പ്യന്ഷിപ്പിന്റെ രണ്ടാം ദിനം വരെ മെഡല് നേടിയ താരങ്ങളെ അഭിനന്ദിച്ച് മുഖ്യമന്ത്രി പിണറായി വിജയന് ഫേസ്ബുക്കില് പോസ്റ്റിട്ടത് മാത്രമാണ് ആകെയുള്ള ആശ്വാസം. കായിക വാര്ത്തകള് വായിക്കുകയോ കായിക താരങ്ങളെക്കുറിച്ച് അറിയുകയോ ചെയ്യാത്ത മന്ത്രിമാരുള്ള നാട്ടില് ഇതില്ക്കൂടുതലൊന്നും പ്രതീക്ഷിക്കേണ്ടെന്നാണ് ഏഷ്യന് ചാമ്പ്യന്ഷിപ്പിലെ ഒരു മെഡല് ജേതാവ് വിലപിച്ചത്.
രാജ്യാന്തരതലത്തില് മറ്റു സംസ്ഥാനക്കാര് മെഡല് നേടിയാല് അതത് സര്ക്കാരുകള് ലക്ഷങ്ങളാണ് ് സമ്മാനം നല്കുന്നത്. അത് പ്രഖ്യാപിക്കുക മാത്രമല്ല, അടുത്ത ദിവസം തന്നെ നല്കുകയും ചെയ്യുന്നു.
ഏഷ്യന് ചാമ്പ്യന്ഷിപ്പില് ആതിഥേയരായ ഒഡിഷയിലെ നവീന് പട്നായ്ക് സര്ക്കാര് നല്കുന്ന പ്രോത്സാഹനം കേരള താരങ്ങളെ അമ്പരപ്പിക്കുകയാണ്. സ്വര്ണ്ണമണിഞ്ഞാല് ഒഡിഷ താരത്തിന് ലഭിക്കുന്നത് ഏഴര ലക്ഷം. വെള്ളിക്ക് അഞ്ചര ലക്ഷവും വെങ്കലത്തിന് രണ്ടര ലക്ഷവും
. വനിതകളുടെ നൂറു മീറ്ററില് ഒഡിഷക്കാരി ദ്യുതി ചന്ദ് വെങ്കലം നേടിക്കഴിഞ്ഞു. 4-100 മീറ്റര് റിലേയില് ദ്യുതിയും മറ്റൊരു ഒഡിഷ താരമായ ശ്രാബനി നന്ദക്കും വെങ്കലമുണ്ട്. ഇവരെല്ലാം സംസ്ഥാന സര്ക്കാറിന്റെ സമ്മാനം ഏറ്റുവാങ്ങാനിരിക്കുകയാണ്. ചാമ്പ്യന്ഷിപ്പ് കഴിയുന്നതിന് തൊട്ടുപിന്നാലെ അവര്ക്കെല്ലാം സമ്മാനത്തുക നല്കും.
കലിംഗയില് കേരള താരങ്ങള് മികച്ച പ്രകടനമാണ് പുറത്തെടുത്തത്. പുരുഷന്മാരുടെ 400 മീറ്ററില് മുഹമ്മദ് അനസും വനിതകളുടെ 1500മീറ്ററില് പി.യു. ചിത്രയും സ്വര്ണ്ണം നേടി. വനിതകളുടെ 400 മീറ്റര് ഹര്ഡ്ല്സില് അനു രാഘവന്, ലോങ്്ജമ്പില് വി. നീന, നയന ജെയിംസ്, 400 മീറ്ററില് ജിസ്ന മാത്യൂ, ട്രിപ്പ്ള്ജമ്പില് എന്.വി. ഷീന, 4-100 മീറ്റര് റിലേ ടീമംഗം മെര്ലിന് ജോസഫ്, പുരുഷന്മാരുടെ 400 മീറ്റര് ഹര്ഡ്ല്സില് എം.പി. ജാബിര് ,800 മീറ്ററില് ജിന്സണ് ജോണ്സണ് ,പതിനായിരം മീറ്ററില് ടി. ഗോപി എന്നിവരും മെഡല് നേടി.
കേരളം ആരു ഭരിച്ചാലും അഭിനന്ദനവും പ്രോത്സാഹനവും കിട്ടേണ്ടവരാണിവര്. അല്ലാതെ മുഖ്യമന്ത്രിയുടെ ഒരു ഫേസ് ബുക്ക് പോസ്റ്റ് മാത്രം പോരാ, ഇവരുടെ കായികജീവിതം മുന്നോട്ടുകൊണ്ടുപോകാന്. പ്രതികൂല സാഹചര്യങ്ങളെയും മറ്റു രാജ്യങ്ങളിലെ കായികപ്രതിഭകളെയും പിന്നിലാക്കിയായിരുന്നു ഇവരുടെ നേട്ടം. ഇവരെ അംഗീകരിക്കാതിരിക്കുന്നത് സംസ്ഥാനത്തിന് നാണക്കേടാണ്.
