നെടുമ്പാശ്ശേരി: ശീതളപാനീയം കുടിച്ചതിന്റെ പണം ചോദിച്ചതിന്റെ വൈരാഗ്യത്തില് കടയുടമയുടെ ചെവിക്കല്ല് തകര്ത്ത കേസില് രണ്ടര മാസമായി ഒളിവിലായിരുന്നയാള് പോലീസ് പിടിയിലായി. അങ്കമാലി മൂക്കന്നൂര് മംഗലത്ത് വീട്ടില് ജിബിന് യാക്കൂബ് (24)നെയാണ് നെടുമ്പാശേരി എസ്ഐ സോണി മത്തായി അറസ്റ്റ് ചെയ്തത്. സംഭവവുമായി ബന്ധപ്പെട്ട് നേരത്തെ രണ്ട് പേര് അറസ്റ്റിലായിരുന്നു.
ഏപ്രില് 30ന് രാത്രിയാണ് കരിയാട് വിമാനത്താവള റോഡില് അകപ്പറമ്പ് റെയില്വേ ഗേറ്റിന് സമീപം കട നടത്തുന്ന ബെന് ജെയിംസി (30)നെ പ്രതികള് മര്ദ്ദിച്ചത്. കട അടയ്ക്കുന്ന സമയത്താണ് പ്രതികളെത്തിയത്. ശീതളപാനീയം കഴിച്ച ശേഷം പണം ആവശ്യപ്പെട്ടപ്പോള് നല്കിയില്ല. ഈ സമയം അവിടെയെത്തിയ പ്രതികളുടെ പരിചയക്കാരനായ ഒരാള് പണം നല്കി പ്രശ്നം അവസാനിപ്പിച്ചു. അല്പ്പസമയത്തിന് ശേഷം മടങ്ങിയെത്തിയ പ്രതികള് ബെന്നിനെ ക്രൂരമായി മര്ദ്ദിക്കുകയായിരുന്നു. സംഭവത്തെ തുടര്ന്ന് ഒളിവില് പോയ അങ്കമാലി കിടങ്ങൂര് സ്വദേശി ആഷിക്ക് (24), കറുകുറ്റി സ്വദേശി എബിന് (28) എന്നിവരെ തൊട്ടടുത്ത ദിവസം പോലീസ് അറസ്റ്റ് ചെയ്തിരുന്നു.
