ആലപ്പുഴ: അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിലെ തിരുവാഭരണം മോഷണം പോയ സംഭവം പ്രത്യേക സംഘം അന്വേഷിക്കണമെന്ന് ഹിന്ദു ഐക്യവേദി സംസ്ഥാന സെക്രട്ടറി പി.വി. മുരളീധരന് പത്രസമ്മേളനത്തില് ആവശ്യപ്പെട്ടു.
കഴിഞ്ഞ വിഷുവിനുശേഷമാണ് തിരുവാഭരണത്തിലെ പതക്കവും രത്നങ്ങളും കാണാതായത്. ഇവ കാണിക്കവഞ്ചിയില് തിരികെ ലഭിച്ചിട്ട് 45 ദിവസമായി. പ്രതികളെക്കുറിച്ച് കൃത്യമായ സൂചന ലഭിച്ചിട്ടും ക്രൈംബ്രാഞ്ച് പിടികൂടാന് തയ്യാറാകുന്നില്ല.
അന്വേഷണം നടക്കുന്നുണ്ടോയെന്നുപോലും സംശയമുയര്ന്നിരിക്കുകയാണ്. പ്രതികളെ ഉടന് പിടികൂടുമെന്ന് നേരത്തെ പോലീസ് വ്യക്തമാക്കിയിരുന്നു. ദേവസ്വം ബോര്ഡും പ്രസിഡന്റും ഇക്കാര്യത്തില് ഒളിച്ചുകളിക്കുകയാണെന്നും അദ്ദേഹം കുറ്റപ്പെടുത്തി.
കുറ്റക്കാരെന്നുകണ്ട അഞ്ചുപേര്ക്കെതിരെ നടപടിയെടുക്കുമെന്ന് പ്രഖ്യാപിച്ചിരുന്നെങ്കിലും ഒന്നും നടപ്പായില്ല. തിരുവാഭരണത്തിന്റെ മുഖ്യ ചുമതലക്കാരനായ അഡ്മിനിസ്ട്രേറ്റീവ് ഓഫീസര്ക്ക് അസി. കമ്മീഷണറായി പ്രമോഷന് നല്കുകയാണുണ്ടായത്.
ക്ഷേത്രത്തിലെ അമൂല്യമായ തിരുവാഭരണം സംരക്ഷിക്കേണ്ടവരും പരിപാലിക്കേണ്ടവരും തന്നെയാണ് ഇത് കവര്ച്ച ചെയ്യപ്പെട്ടതിന് ഉത്തരവാദികള്. വരും ദിവസങ്ങളില് ഹര്ത്താല് ദേശീയപാത ഉപരോധം അടക്കമുള്ള ശക്തമായ സമര പരിപാടികള് സംഘടിപ്പിക്കുമെന്നും അദ്ദേഹം പറഞ്ഞു.
നിലവില് സമരം അഞ്ചാം ദിവസത്തിലേക്ക് കടന്നിരിക്കുകയാണ്. ജില്ലാ സംഘടനാ സെക്രട്ടറി കെ.ജി. സഹജന്, സമര സമിതി ചെയര്മാന് അനില് പാഞ്ചജന്യം, കണ്വീനര് ഡി. സുഭാഷ്, ബിനീഷ് ബോയ് എന്നിവര് പങ്കെടുത്തു.
