പാലക്കാട് : സ്കൂള്-കോളേജുകള് കേന്ദ്രീകരിച്ച് വിതരണത്തിനെത്തിച്ച രണ്ടു ലക്ഷം രൂപയുടെ കഞ്ചാവുമായി കോളജ് വിദ്യാര്ഥികള് ഉള്പ്പെടെ നാലുപേരെ എക്സൈസ് അറസ്റ്റ് ചെയ്തു.
ഒലവക്കോട് റെയില്വേ സ്റ്റേഷനില് എക്സൈസും റെയില്വേ സംരക്ഷണസേനയും സംയുക്തമായി നടത്തിയ പരിശോധനയിലാണു രണ്ടു സംഭവങ്ങളിലായി രണ്ടര കിലോയിലധികം കഞ്ചാവ് പിടിച്ചത്.
കോട്ടയം സ്വദേശികളായ കാഞ്ഞിപ്പള്ളി എരുമേലി വാഴക്കലയില് അമീര്ഷ മുഹമ്മദ് (22), നെല്ലിത്താനത്തു മുബാറക്ക് (21), പ്രിന്സ് (28), പത്തനംതിട്ട സ്വദേശി ശരത് (25) എന്നിവരെ അറസ്റ്റു ചെയ്തു. ശരത്തിന്റെയും പ്രിന്സിന്റെയും ശരീരത്തിലെ വിവിധ ഭാഗങ്ങളില് പൊതികളാക്കി ഒളിപ്പിച്ചുസൂക്ഷിച്ച 150 ഗ്രാം കഞ്ചാവാണ് ആദ്യം എക്സൈസ് പിടിച്ചെടുത്തത്.
പരിശോധന സംഘത്തെ കണ്ട് രക്ഷപ്പെടാന് ശ്രമിച്ച പ്രതികളെ പിന്തുടര്ന്നാണു കൂടുതല് കഞ്ചാവ് പിടികൂടിയത്. പഴനിയില് നിന്നാണു കഞ്ചാവ് കൊണ്ടുവന്നതെന്നും ജില്ലയില് സ്കൂള്-കോളജുകള് കേന്ദ്രീകരിച്ചു ലഹരിമരുന്നു വില്ക്കുന്നവരില് പ്രധാനികളാണ് ഇവരെന്നും എക്സൈസ് പറഞ്ഞു.
ട്രെയിനില് കടത്താന് ശ്രമിച്ച ഒന്നര കിലോയിലധികം കഞ്ചാവാണു കോട്ടയത്തെ കോളജ് വിദ്യാര്ഥികളായ മറ്റു രണ്ടുപേരില് നിന്നു പിടികൂടിയത്. എക്സൈസ് സ്പെഷല് സ്ക്വാഡും ഇന്റലിജന്സ് ബ്യൂറോയും ചേര്ന്നായിരുന്നു പരിശോധന. എക്സൈസ് ഇന്സ്പെക്ടര് എം സുരേഷിന്റെ നേതൃത്വത്തിലാണ് പുലര്ച്ചേ 4-50നാണ് പരിശോധന നടത്തിയത്.
പാലക്കാട് കോടതി പതിനഞ്ച് ദിവസത്തേക്ക് പ്രതികളെ റിമാന്റ് ചെയ്തു.
