ന്യൂദല്ഹി: യുപിഎ ഭരണകാലത്തെ അപേക്ഷിച്ച് ആള്ക്കൂട്ട അക്രമങ്ങളും കൊലപാതകങ്ങളും കുറഞ്ഞതായി ബിജെപി ദേശീയ അധ്യക്ഷന് അമിത് ഷാ. ഇപ്പോഴുള്ളതിനേക്കാള് ഇരട്ടിയിലേറെ അക്രമങ്ങളാണ് യുപിഎ സര്ക്കാരിന് കീഴില് അരങ്ങേറിയത്. ഗോവയില് പാര്ട്ടി പരിപാടിക്കെത്തിയ അദ്ദേഹം മാധ്യമങ്ങളോട് സംസാരിക്കുകയായിരുന്നു.
ഇപ്പോഴത്തെ സംഭവങ്ങളെ നിസാരവത്കരിക്കാനോ താരതമ്യം ചെയ്യാനോ താല്പര്യമില്ല. വിഷയം ഗൗരവത്തോടെയാണ് കാണുന്നത്. 2011 മുതല് 2013 വരെയുള്ള യുപിഎ ഭരണകാലത്താണ് ഏറ്റവുമധികം ആള്ക്കൂട്ട കൊലപാതകങ്ങള് നടന്നത്. മൂന്ന് വര്ഷത്തെ എന്ഡിഎ ഭരണത്തിലുള്ളതിനേക്കാള് കൂടുതല് സംഭവങ്ങള് അന്ന് ഓരോ വര്ഷവും നടന്നിരുന്നു, അദ്ദേഹം വ്യക്തമാക്കി.
രാജ്യത്ത് ഭയത്തിന്റെ അന്തരീക്ഷമുണ്ടെന്ന ആരോപണവും ഷാ തള്ളി. എവിടെയങ്കിലും കുറ്റവാളികള്ക്കെതിരെ നടപടിയെടുക്കാതിരുന്നിട്ടുണ്ടോ?അദ്ദേഹം ചോദിച്ചു. ക്രമസമാധാനം സംസ്ഥാനത്തിന്റെ വിഷയമാണ്. ദാദ്രിയില് അഖ്ലാഖ് കൊല്ലപ്പെട്ടപ്പോള് സമാജ്വാദി പാര്ട്ടിയുടെ സര്ക്കാരാണ് ഉത്തര് പ്രദേശ് ഭരിച്ചിരുന്നത്. അതിന് ഇപ്പോഴത്തെ സര്ക്കാരിനെ കുറ്റപ്പെടുത്തുന്നതില് എന്താണ് അര്ത്ഥം. ഇതിന്റെ പേരില് കേന്ദ്രസര്ക്കാരിനെതിരെ പ്രതിഷേധിക്കുന്നത് ശരിയല്ല. പ്രധാനമന്ത്രി ഇത്തരം അക്രമങ്ങളെ തള്ളിപ്പറഞ്ഞിട്ടുണ്ട്.
ഗുജറാത്തിലും രാജസ്ഥാനിലും മധ്യപ്രദേശിലും ഗോവയിലെ മൊത്തം ജനസംഖ്യയേക്കാള് കൂടുതല് ന്യൂനപക്ഷങ്ങളുണ്ട്. പതിനഞ്ച് വര്ഷത്തിലേറെയായി ഈ സംസ്ഥാനങ്ങള് ബിജെപി ഭരിക്കുകയാണ്. ബിജെപി ന്യൂനപക്ഷങ്ങള്ക്കെതിരാണെന്ന് ചിലര് കുപ്രചാരണം നടത്തിയിട്ടും ബിജെപി ഭരണത്തില് ന്യൂനപക്ഷങ്ങള് സുരക്ഷിതരാണ്, ഷാ പറഞ്ഞു.
