കോട്ടയം: വീട്ടുജോലിക്കാരെയും ഹോം നഴ്സുമാരെയും റിക്രൂട്ട് ചെയ്യുന്ന ജില്ലയിലെ റിക്രൂട്ട്മെന്റ ഏജന്സികള്ക്ക് നിയന്ത്രണം. ജോലിക്കായി എത്തുന്നുവരുമായി ബന്ധപ്പെട്ട് വീടുകളില് ഉണ്ടായിട്ടുള്ള അനിഷ്ടസംഭവങ്ങളെ തുടര്ന്ന് ജില്ലാ പോലീസ് മേധാവിയാണ് നിയന്ത്രണം ഏര്പ്പെടുത്തിയത്.
ഏജന്സികളുടെ പ്രവര്ത്തനങ്ങള് നിരീക്ഷിക്കാനും ലൈസന്സ് ഇല്ലാതെ പ്രവര്ത്തിക്കുന്ന ഏജന്സികള്ക്കെതിരെ നിയമനടപടികള് സ്വീകരിക്കുവാനും തീരുമാനമായി. ജോലിക്കായി വീടുകളില് എത്തിക്കുന്നവരില് പലരും ക്രിമിനല് പശ്ചാത്തലമുള്ളവരും വിവിധ കേസ്സുകളില് ഉള്പ്പെട്ടവരും ആയതായി കണ്ടെത്തിയതിനെ തുടര്ന്നാണ് നിയന്ത്രണം.
ഇങ്ങനെ ജോലിക്കായി എത്തുന്നവരുടെ മുന്കാലചരിത്രവും സ്വഭാവും പരിശോധിച്ച് മാത്രം റിക്രൂട്ട് ചെയ്യാന് ഏജന്സികള്ക്ക് നിര്ദേശം നല്കും. ക്രിമിനല് പശ്ചാത്തലുമള്ളവരെ കാണുവാന് പുറത്തുനിന്ന് ക്രിമിനലുകള് എത്തി പ്രശ്നങ്ങള് ഉണ്ടാക്കുന്നായി കണ്ടെത്തിയിരുന്നു. കൊലപാതകം, തട്ടിക്കൊണ്ടുപോകല്, ഭവനഭേദനം തുടങ്ങിയ കുറ്റകൃത്യങ്ങള്ക്ക് ഇത് ഇടയാക്കുന്നതായും ശ്രദ്ധയില്പ്പെട്ടു.
അതത് സബ് ഡിവിഷണല് ഓഫീസില് നിന്നും ഏജന്സികള് പോലീസിന്റെ നിര്ദേശങ്ങള്ക്ക് അനുസരിച്ചാണ് പ്രവര്ത്തിക്കുന്നതെന്ന് സാക്ഷ്യപ്പെടുത്തിയ പോലീസ് ക്ലീയറന്സ് സര്ട്ടിഫിക്കറ്റ് ഇനിമുതല് വാങ്ങണം. ഏജന്സികളില് നിന്നും അയയ്ക്കുന്ന ആളുകള് മുഖാന്തിരം എന്തെങ്കിലും പ്രശ്നങ്ങള് ഉണ്ടായാല് ഉത്തരവാദിത്വം അതാത് ഏജന്സിക്കായിരിക്കും. ഇത് രേഖപ്പെടുത്തിയ സാക്ഷ്യപത്രം അതാത് ഏജന്സികള് പോലീസിന് നല്കണം.
ജോലിക്ക് അയയ്ക്കുന്നവരുടെ ഫോട്ടോയും വിലാസവും ഐഡിപ്രൂഫും ഏജന്സികളില് സൂക്ഷിക്കണം. ആയത് കുറ്റകൃത്യങ്ങള് തടയുന്നതിനും തെളിയിക്കുന്നതിനും പോലീസിന് സഹായകരമാകും എന്നാണ് വിലയിരുത്തല്. ഇക്കാര്യങ്ങള് കാണിച്ച് ജില്ലാ പോലീസ് മേധാവി എന്. രാമചന്ദ്രന് ഐപിഎസ് ജില്ലയിലെ എല്ലാ പോലീസ് സ്റ്റേഷനുകളിലേക്കും സര്ക്കുലര് അയച്ചിട്ടുണ്ട്. സര്ക്കിള് ഓഫീസുകളിലേക്കും സബ് ഡിവിഷണല് ഓഫീസുകളിലേക്കും ഇതിന്റെ പകര്പ്പ് നല്കിയിട്ടുണ്ട്.
