കോഴിക്കോട്: എന് പ്രഭാകരന്റെ തിയ്യൂര് രേഖകളുടെ നാടകാവിഷ്കാരത്തിന് സിപിഎമ്മിന്റെ വിലക്ക്. വിലക്ക് ലംഘിച്ച് നിരവധി സിപിഎം പ്രവര്ത്തകരും കലാ-സാംസ്കാരിക പ്രവര്ത്തകരും നാടകം കാണാനെത്തിയത് സിപിഎം നേതൃത്വത്തെ ഞെട്ടിച്ചു.
പുറമേരി ഹൈസ്കൂള് ഗ്രൗണ്ടില് ഫെബ്രുവരി 18,19 തിയ്യതികളിലാണ് നാടകം അരങ്ങേറിയത്. എസ്എഫ്ഐ മുന് കേന്ദ്ര കമ്മിറ്റി അംഗം കെഎസ് ബിമലിന്റെ ഓര്മ്മക്കായി സിപിഎം ശക്തികേന്ദ്രമായ എടച്ചേരിയില് സാംസ്കാരിക ഗ്രാമം പണിയുന്നതിനുള്ള ധനശേഖരണാര്ത്ഥമാണ് നാടകാവതരണം സംഘടിപ്പിച്ചത്. ടി.പി. ചന്ദ്രശേഖരന് വധത്തിനു ശേഷം പാര്ട്ടി നേതൃത്വവുമായി അകന്നു നില്ക്കുന്നവരാണ് നാടകം സംഘടിപ്പിച്ചത്. സിപിഎം സംസ്ഥാന നേതാക്കള് അടക്കമുള്ളവര് പങ്കെടുത്ത യോഗത്തിലാണ് നാടകം ബഹിഷ്കരിക്കാന് തിരുമാനമെടുത്തത്. വിലക്ക് ലംഘിച്ച് നാടകം കാണാനെത്തുന്നവരെക്കുറിച്ച് റിപ്പോര്ട്ടു ചെയ്യാന് നേതൃത്വം ആളുകളെയും ഏര്പ്പാട് ചെയ്തിരുന്നു. എന്നാല് വിലക്ക് ലംഘിച്ച് നാടകം കാണാന് നിരവധി പേരെത്തി. സിപിഎം സഹയാത്രികരായ കലാ-സാംസ്കാരിക പ്രവര്ത്തകരും നാടകം കാണാനെത്തിയിരുന്നു.
എസ്എഫ്ഐ സംസ്ഥാന നേതൃനിരയില് ഉണ്ടായിരുന്ന ബിമല് സാഹിത്യനാടക പ്രവര്ത്തനങ്ങളില് സജീവമായിരുന്നു. 2015 ലാണ് ശ്വാസകോശാര്ബുദം പിടിപെട്ട് ബിമല് മരിച്ചത്. ടി.പി. ചന്ദ്രശേഖരന് കൊല്ലപ്പെട്ടതിനു ശേഷം ജനാധിപത്യ സംരക്ഷണ വേദി രൂപീകരിച്ച് ബിമല് നിരവധി പ്രവര്ത്തനങ്ങള് സംഘടിപ്പിച്ച് സിപിഎം നേതൃത്വവുമായി ഭിന്നിച്ച് നില്ക്കുകയായിരുന്നു. ബിമലിന്റെ ഓര്മ നിലനിര്ത്താനാണ് സഹപ്രവര്ത്തകര് എടച്ചേരിക്കടുത്ത് ഒരേക്കര് സ്ഥലത്ത് സാംസ്കാരിക കേന്ദ്രം പണിയാന് തീരുമാനിച്ചത്. യൂജിന് പണ്ടാലയുടെ പദ്ധതിയിലാണ് സാംസ്കാരിക ഗ്രാമം തുടങ്ങാനിരിക്കുന്നത്.
ചില രാഷ്ട്രീയ പാര്ട്ടികളുടെ എതിര്പ്പിനെ തങ്ങള് വകവെക്കുന്നില്ലെന്ന് സംഘാടകര് പറഞ്ഞു. എന്തിനാണ് നാടകത്തിന് വിലക്കേര്പ്പെടുത്തിയതെന്ന് അറിയില്ല. എന്തു വിലക്കുണ്ടായാലും ബിമലിന്റെ സ്വപ്നങ്ങള്ക്കനുസരിച്ച് സാംസ്കാരിക ഗ്രാമം പണിയുമെന്ന് ബിമല് സാംസ്കാരിക ഗ്രാമം നിര്മാണമിതി ട്രഷറര് പി. വിനോദന്മാസ്റ്റര് പറഞ്ഞു. കെ.പി. ചന്ദ്രന് ചെയര്മാനും എം. സിജു ജനറല് കണ്വീനറുമായ കമ്മിറ്റിയാണ് സാംസ്കാരിക ഗ്രാമത്തിന്റെ നിര്മ്മാണസമിതിയുടെ ചുമതല വഹിക്കുന്നത്. സിപിഎമ്മിന്റെ നാടകവിലക്കിനെതിരെ വ്യാപകമായ പ്രതിഷേധം ഉയര്ന്നിട്ടുണ്ട്.
