ആലപ്പുഴ: നടിയെ ആക്രമിച്ച കേസിലെ പ്രധാന പ്രതി പള്സര് സുനിക്ക് കോട്ടു കൊടുത്ത് സഹായിച്ച വക്കീലിനെ അറസ്റ്റ് ചെയ്യണമെന്ന് മന്ത്രി ജി. സുധാകരന്. അഭിഭാഷകര് നിയമങ്ങളെ വ്യാഖ്യാനിക്കുന്നവരാകണം അല്ലാതെ ക്രിമിനലുകളെ സംരക്ഷിക്കുന്നവരാകരുത്. പ്രതിയെ പിടികൂടുന്നത് ചില അഭിഭാഷകര് എതിര്ത്തു. ഇത് അംഗീകരിക്കാനാകില്ലെന്നും മന്ത്രി പറഞ്ഞു. ജനമൈത്രി പോലീസ് സംഘടിപ്പിച്ച ഏകദിന ശില്പ്പശാല ‘സ്ത്രീ പുരുഷസമത്വ നിയമബോധവത്കരണം’ പരിപാടി ഉദ്ഘാടനം ചെയ്യുകയായിരുന്നു മന്ത്രി.
വക്കീലിന്റെ കോട്ടിട്ടാണ് പ്രതി കോടതിയിലെത്തിയത്, വക്കീലിന്റെ സഹായത്തോടെ ആള്മാറാട്ടമാണ് നടന്നത്. ന്യായാധിപന്മാര് ഇരിക്കുമ്പോള് മാത്രമാണ് കോടതി മുറിയാകുന്നത്. അല്ലാത്തപ്പോള് അത് വെറും മുറി മാത്രമാണ്. മജിസ്ട്രേറ്റ് നിര്ദ്ദേശിച്ചാല് മാത്രമെ കോടതിയിലെ കൂട്ടില് കയറി നില്ക്കാന് അനുവാദമുള്ളു. അല്ലാതെ ആര്ക്കും കയറി നില്ക്കാനുള്ള ഇടമല്ല അത്.
ക്രിമിനലുകളെ സംരക്ഷിക്കുന്നവര് ആരായാലും അവര്ക്കെതിരെ ശക്തമായ നിയമ നടപടി സ്വീകരിക്കണം. പോലീസിലും ക്രിമിനലുകളുണ്ട്, അവരെ പ്രോത്സാഹിപ്പിക്കരുത്. സംഭവത്തില് രാഷ്ട്രീയ പാര്ട്ടികളും, ചലച്ചിത്ര പ്രവര്ത്തകരും നടത്തിയ ഒത്തുകളി പൊളിഞ്ഞു. അക്രമസംഭവങ്ങള്ക്കു പിന്നില് രാഷ്ട്രീയ പ്രവര്ത്തകരും ചലച്ചിത്ര പ്രവര്ത്തകരും ക്രിമിനലുകളുമാണെന്നും മന്ത്രി പറഞ്ഞു.
