കോട്ടയം: എംസിറോഡില് കോടിമത മുതല് സിവില്സപ്ലൈസ് പമ്പുവരെയുള്ള നാലുവരിപ്പാത സൗന്ദര്യവത്ക്കരിക്കാനുള്ള പദ്ധതി പാതിവഴിയില്. മാസങ്ങള്ക്ക് മുമ്പ് സൗന്ദര്യവത്ക്കരണ ജോലികള് ആരംഭിച്ചെങ്കിലും പദ്ധതി ഇപ്പോഴും അനിശ്ചിതത്വത്തിലാണ്. കേന്ദ്രസര്ക്കാര് പദ്ധതിയായ ഗ്രീന് ഇന്ത്യ മിഷന്റെ ഭാഗമായി ഹരിതകേരളം പദ്ധതിയിലൂടെയാണ് സൗന്ദര്യവത്ക്കരണം. നാലുവരിപ്പാതക്ക് നടുവില് ചെടികള് നട്ടുപിടിപ്പിച്ച് വേലികെട്ടി നഗരകവാടം മനോഹരമാക്കുക എന്ന ലക്ഷ്യത്തോടെയാണ് പദ്ധതിക്ക് തുടക്കം കുറിച്ചത്. ഉദ്യാനവേലികളില് പരസ്യം പ്രദര്ശിപ്പിക്കാന് അനുവാദം നല്കുന്നതിലൂടെ ലഭിക്കുന്ന പണം നവീകരണ പ്രവര്ത്തനങ്ങള്ക്ക് ഉപയോഗിക്കാനും പദ്ധതിയിട്ടിരുന്നു. രണ്ടുമാസം മുന്പാണ് പദ്ധതിക്കാവശ്യമായ മൈക്രോപ്ലാന് ഫോറസ്റ്റ് ഡിവിഷനില് നിന്നും തയ്യാറാക്കി ഫോറസ്റ്റ് ഡവലപ്പ്മെന്റ് ഏജന്സിയിലേക്ക് അയച്ചത്. എന്നാല് ഫോറസ്റ്റ് ഡിവിഷന്റെ അനുമതി ലഭിച്ചിട്ടും ഡവലപ്പ്മെന്റ് ഏജന്സിയില് നിന്നും അനുമതി ലഭിക്കാത്തതിനാല് തുടര് പ്രവര്ത്തനങ്ങള് തുടരാന് കഴിയാത്ത നിലയിലാണ്. പ്രവര്ത്തനങ്ങള് വേഗത്തില് നടത്താന് ഗ്രാമഹരിതസഭ എന്ന 20 അംഗ കമ്മിറ്റിക്കും ഡിവിഷന് രൂപം നല്കി. ഇനി ഫോറസ്റ്റ് ഡവലപ്പമെന്റ് ഏജന്സിയുടെ അനുമതി ലഭിച്ചാല് മാത്രമേ പ്രവര്ത്തനങ്ങള്ക്കുള്ള പണം ലഭിക്കുകയുള്ളൂ. അതിനാല് ഉദ്യാന നിര്മ്മാണത്തിന്റെ ഭാഗമായ 500 മീറ്റര് നീളമുള്ള വേലിനിറയെ കാടുപിടിച്ച് കിടക്കുന്ന അവസ്ഥയാണ് ഇപ്പോഴുള്ളത്. സുന്ദരമായ പദ്ധതികള്ക്ക് രൂപം നല്കുകയും ഒടുവില് അനുമതിയുടെ പേരില് കടലാസില് മാത്രം ഒതുങ്ങുകയും ചെയ്യുന്ന മറ്റ് പദ്ധതികളുടെ അവസ്ഥതന്നെയാണ് കോടിമത നാലുവരിപ്പാതയ്ക്കും ഉണ്ടായത്.
കോടിമതയിലെ നാലുവരിപ്പാതകോടിമതയിലെ നാലുവരിപ്പാതസൗന്ദര്യവത്ക്കരണം കടലാസില് മാത്രം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.