തിരുവനന്തപുരം: പൊതുവിദ്യാഭ്യാസവകുപ്പ് സംഘടിപ്പിക്കുന്ന അത്ലറ്റിക് മത്സരങ്ങളുടെ സമയക്രമം നിശ്ചയിക്കുമ്പോള് ദൈര്ഘ്യമേറിയ ഇനങ്ങളില് പങ്കെടുക്കുന്ന കുട്ടികള്ക്ക് ശരിയായ പ്രകടനം കാഴ്ചവയ്ക്കുന്നതിന് തടസ്സമാകുന്നതരത്തിലുളള വൈരുദ്ധ്യങ്ങള് ഉണ്ടാകുന്നില്ലെന്ന് ഉറപ്പാക്കണമെന്ന് സംസ്ഥാന ബാലാവകാശ സംരക്ഷണ കമ്മീഷന് പൊതുവിദ്യാഭ്യാസവകുപ്പ് ഡയറക്ടര്ക്ക് നിര്ദ്ദേശം നല്കി. ഇക്കാര്യം കാണിച്ച് ഉത്തരവ് പുറപ്പെടുവിക്കാനും കമ്മീഷന് ആവശ്യപ്പെട്ടു.
സബ് ജില്ലാതല മത്സരത്തില് വിജയിച്ച് കോഴിക്കോട് റവന്യൂ ജില്ലതല മത്സരത്തില് പങ്കെടുക്കാന് എത്തിയ വിദ്യാര്ത്ഥിക്ക് പ്രഖ്യാപിച്ച ദിവസത്തിനു തലേന്നുതന്നെ മത്സരം നടത്തിയതിനാല് പങ്കെടുക്കാനായില്ലെന്ന പരാതിയിലാണ് കമ്മീഷന്റെ ഉത്തരവ്. 3,000 മീറ്റര്, 1,000 മീറ്റര് എന്നിവ ഉള്പ്പെടെയുളള ദൈര്ഘ്യമേറിയ മത്സരങ്ങളുടെ സമയക്രമവും മത്സരം നടത്തുന്ന ദിവസവും കുട്ടികള്ക്ക് ശരിയായ പ്രകടനം കാഴ്ചവയ്ക്കാന് പറ്റാത്ത രീതിയില് ആയിരിക്കരുതെന്ന് കമ്മീഷന് വ്യക്തമാക്കി.
സമയക്രമത്തിലെയും മത്സരദിവസങ്ങള് ക്രമീകരിച്ചതിലെയും പിഴവുമൂലം മത്സരം മാറ്റിവയ്ക്കാതിരിക്കാന് പ്രത്യേകശ്രദ്ധയും ജാഗ്രതയും പുലര്ത്തണമെന്നും പൊതുവിദ്യാഭ്യാസവകുപ്പ് ഡയറക്ടറോട് കമ്മീഷന് ആവശ്യപ്പെട്ടിട്ടുണ്ട്.
