ശ്രീനിവാസ് പ്രസാദ്
ബെംഗളൂരു : ബിജെപി നേതാവും കൗണ്സിലറുമായ ശ്രീനിവാസ് പ്രസാദ് എന്ന കിതഗനഹള്ളി വാസു (38)വിനെ അജ്ഞാതര് വെട്ടിക്കൊന്നു. തെക്കു കിഴക്കന് ബെംഗളൂരുവിലെ ബൊമ്മ സാന്ദ്രയില് ഇന്നലെ പുലര്ച്ചെ അഞ്ചിന് ശ്രീനിവാസിന്റെ കാറ് തടഞ്ഞു നിര്ത്തി പുറത്തിറക്കിയശേഷം വെട്ടിക്കൊല്ലുകയായിരുന്നു. സൂര്യ സിറ്റി പോലീസ് സ്റ്റേഷന് പരിധിയിലാണ് കൊലപാതകം നടന്നത്.
ബൊമ്മസാന്ദ്ര മുനിസിപ്പല് കൗണ്സില് അംഗമാണ് ശ്രീനിവാസ്. നിയമസഭാ തെരഞ്ഞെടുപ്പില് അനേകല് മണ്ഡലത്തില് നിന്ന് ബിജെപി ടിക്കറ്റില് മത്സരിച്ചിട്ടുണ്ട്. ശ്രീനിവാസിന്റെ ഭാര്യ ഷൈലജ ജില്ല പഞ്ചായത്ത് അംഗമാണ്. ഒമ്പതും അഞ്ചും വയസ് വീതമുള്ള ഒരു മകനും മകളുമുണ്ട്. രാഷ്ട്രീയ വൈരമാണ് കൊലപാതകത്തിനു പിന്നിലെന്നാണ് കരുതുന്നത്. മിത ഭാഷിയായ ശ്രീനിവാസിനെതിരെ ഒരു കേസുമില്ല. സര്വ്വസമ്മതനുമാണ്.
അതേസമയം കൊലപാതകം സംബന്ധിച്ച് അന്വേഷണം തുടരുകയാണെന്നും ഇപ്പോള് ഇതു സംബന്ധിച്ച് പ്രതികരിക്കാനില്ലെന്നും ബെംഗളൂരു റൂറല് എസ്പി വിനീത് സിങ് അറിച്ചു.
ഒക്ടോബര് 16ന് ആര്എസ്എസ് പ്രവര്ത്തകനെ ബെംഗളൂരുവില് വെച്ച് വെട്ടിക്കൊലപ്പെടുത്തിയിരുന്നു. ഇതിനെ തുടര്ന്ന് ബിജെപി ആര്എസ്എസ് പ്രവര്ത്തകര് സംസ്ഥാന വ്യാപകമായി പ്രതിഷേധം സംഘടിപ്പിച്ചിരുന്നു. കഴിഞ്ഞ രണ്ടു വര്ഷത്തിനുള്ളില് പത്തോളം ആര്എസ്എസ് ബിജെപി പ്രവര്ത്തകരാണ് സംസ്ഥാനത്ത് കൊല്ലപ്പെട്ടത്.
