കോഴിക്കോട്: ഹൈവാട്ടര് പ്രഷര് മോട്ടോറിനുള്ളില് ഒളിപ്പിച്ച് കടത്താന് ശ്രമിച്ച ഒന്നേകാല് കോടിരൂപയുടെ സ്വര്ണ്ണം കസ്റ്റംസ് പിടികൂടി. കരിപ്പൂര് വിമാനത്താവളത്തില് നിന്നും കസ്റ്റംസ് പ്രിവന്റീവ് കോഴിക്കോട് ഡിവിഷന് അസിസ്റ്റന്റ് കമ്മീഷണറുടെ നേതൃത്വത്തിലുള്ള സംഘമാണ് 4.278 കിലോ സ്വര്ണം പിടികൂടിയത്.
വിപണിയില് ഇതിന് 1,22,16,000 രൂപ വിലവരുമെന്ന് കസ്റ്റംസ് അധികൃതര് അറിയിച്ചു. ഇന്നലെ പകല് ദുബായില് നിന്നും എത്തിയ ഒമാന് എയര്വേയ്സിലെ യാത്രക്കാരായ താമരശ്ശേരി കൂടത്തായി സ്വദേശി നൗഷാദ്, കാസര്കോഡ് തളങ്കര സ്വദേശി മുഹമ്മദ് റാഫി സ്വദേശികളാണ് പിടിയിലായത്. ഇവരെ പിന്നീട് ജാമ്യത്തില് വിട്ടു.
വിമാനത്താവളത്തിലെ ഗ്രീന്ചാനല് വഴി പുറത്തിറങ്ങാനിരുന്ന ഇവരെ രഹസ്യവിവരത്തിന്റെ അടിസ്ഥാനത്തിലാണ് കസ്റ്റംസ് അധികൃതര് പിടികൂടിയത്. ഇവരുടെ കൈവശമുണ്ടായിരുന്ന വസ്തുക്കള് പരിശോധിച്ചതില് നിന്നാണ് സ്വര്ണം കണ്ടെത്തിയത്. വാട്ടര് പമ്പിന്റെ മോട്ടോറിനു മുകളിലായി ആവരണം ചെയ്ത നിലയിലായിരുന്നു സ്വര്ണം.
